തിരൂര്‍: അനുയോജ്യരായ വധൂവരന്‍മാരെ കണ്ടെത്തി തരാമെന്ന് വാഗ്ദാനം ചെയ്ത് വിവാഹതല്‍പരരായ യുവതീ യുവാക്കളുടെ രക്ഷിതാക്കളില്‍നിന്ന് ഫീസ് ഈടാക്കി പ്രവര്‍ത്തിക്കുന്ന ജില്ലയിലെ ഒട്ടുമിക്ക വിവാഹ ബ്യൂറോകള്‍ക്കും ലേബര്‍ ഓഫിസില്‍നിന്നുള്ള ലൈസന്‍സില്ല. സ്ഥാപനം അതത് തദ്ദേശസ്വയംഭരണ സ്ഥാപനങ്ങള്‍ക്ക് കീഴില്‍ പോലും രജിസ്റ്റര്‍ ചെയ്ത് ലൈസന്‍സ് വാങ്ങാതെയാണ് പ്രവര്‍ത്തിക്കുന്നത്.
എന്നിട്ടും ഇത്തരത്തിലുള്ള അനധികൃത മാട്രിമോണിയല്‍ സ്ഥാപനങ്ങളെക്കുറിച്ച് അന്വേഷണമോ നടപടിയോ ഉണ്ടാകുന്നില്ല. വിവാഹന്വേഷകരായവരില്‍നിന്നും അവരുടെ രക്ഷിതാക്കളില്‍നിന്നും ഫീസ് ഈടാക്കി പ്രവര്‍ത്തിക്കുന്ന വിവാഹ ബ്യൂറോകള്‍ ഉറപ്പുവരുത്തേണ്ട സുതാര്യത പോലും പലപ്പോഴും പല സ്ഥാപനങ്ങളും പാലിക്കുന്നില്ല. പലതും പണം പിടുങ്ങാനുള്ള തട്ടിപ്പ് കേന്ദ്രങ്ങളാണെന്നാണ് ആരോപണം.
ഇക്കാര്യങ്ങള്‍ വ്യക്തമാക്കി കേരള സ്റ്റേറ്റ് മാര്യേജ് ബ്യൂറോ ആന്‍ഡ് ഏജന്റ്‌സ് അസോസിയേഷന്‍ തന്നെയാണ് രംഗത്തുവന്നിരിക്കുന്നത്. വ്യാജമാട്രിമോണിയല്‍ മേഖലയെക്കുറിച്ച് അന്വേഷണം നടത്തണമെന്ന് സര്‍ക്കാരിനോട് ആവശ്യപ്പെട്ടതുമായി ബന്ധപ്പെട്ട തര്‍ക്കങ്ങളെ തുടര്‍ന്ന് സംഘടനയുടെ സംസ്ഥാന സെക്രട്ടറിയ്ക്ക് തന്നെ മര്‍ദനമേറ്റ സാഹചര്യത്തിലാണ് വെളിപ്പെടുത്തല്‍. ഈയൊരു സാഹചര്യത്തില്‍ വ്യാജ ഏജന്റുമാര്‍ക്കെതിരേയും വിവാഹ ബ്യൂറോകള്‍ക്കെതിരേയും നിയമനടപടി സ്വീകരിക്കാനൊരുങ്ങുകയാണിവര്‍. വിവാഹ ബ്യൂറോകളുടെ ഇടപാടുകള്‍ മിക്കപ്പോഴും ഓണ്‍ലൈനിലും തപാല്‍ മുഖേനയുമായതിനാല്‍ സാമ്പത്തിക തട്ടിപ്പിന് സാധ്യതയേറെയാണ്.
ബ്യൂറോകളുടെ വെബ്‌സൈറ്റും പത്രപരസ്യങ്ങളും കണ്ട് ഫോണ്‍ മുഖേനയും നേരിട്ടും ബന്ധപ്പെടുന്നവരെ മോഹനവാദ്ഗാനങ്ങള്‍ നല്‍കി ആകൃഷ്ടരാക്കി ഫീസ് ഈടാക്കുകയാണ് പതിവ്. മറ്റ് ബ്യൂറോകളുടെ വെബ്‌സൈറ്റുകളിലും പത്രപരസ്യങ്ങളിലും കാണുന്ന യുവതീ യുവാക്കളുടെ ഫോട്ടോകളും വിവരങ്ങളും തപാല്‍ മുഖേന അയച്ചുകൊടുത്ത് കബളിപ്പിക്കുന്നവരുമുണ്ട്. സാമ്പത്തിക തട്ടിപ്പിനിരയാകുന്നവര്‍ മാനഹാനിയോര്‍ത്ത് സംഭവം പുറത്തുപറയാത്തതിനാലും പൊലിസില്‍ പരാതി നല്‍കാത്തതിനാലും പല സംഭവങ്ങളും പുറംലോകമറിയാതെ പോകുകയാണ്.

'വ്യാജ ബ്യൂറോകള്‍: നടപടിയെടുക്കണം'

തിരൂര്‍: അനധികൃത വിവാഹ ബ്യൂറോകള്‍ക്കെതിരേ അന്വേഷണം നടത്തി കര്‍ശന നടപടിയെടുക്കണമെന്ന് കേരള സ്റ്റേറ്റ് മാര്യേജ് ബ്യൂറോ ആന്‍ഡ് ഏജന്റ്‌സ് അസോസിയേഷന്‍ ഭാരവാഹികള്‍ വാര്‍ത്താസമ്മേളനത്തില്‍ ആവശ്യപ്പെട്ടു. ഇക്കാര്യമുന്നയിച്ച് മുഖ്യമന്ത്രി, തൊഴില്‍ മന്ത്രി എന്നിവര്‍ക്ക് പരാതി നല്‍കിയതായി ഭാരവാഹികള്‍ പറഞ്ഞു.
ഇതിന്റെ പേരില്‍ സംസ്ഥാന സെക്രട്ടറി കെ.എം രവീന്ദ്രന്‍ അടക്കമുള്ള നേതാക്കളെ മഞ്ചേരി ഓര്‍ക്കിഡ് മാട്രിമോണി ഉടമ കെ. സമീര്‍ അസോസിയേഷന്‍ യോഗത്തിനിടെ മര്‍ദ്ദിച്ചെന്നും ഇവര്‍ പറഞ്ഞു. പത്രങ്ങളില്‍ പരസ്യം നല്‍കി ജനങ്ങളെ കബളിപ്പിക്കുന്ന ജില്ലയിലെ വ്യാജ മാട്രിമോണിയല്‍ സ്ഥാപനങ്ങള്‍ക്കെതിരേ അസോസിയേഷന് നിരവധി പരാതികള്‍ ലഭിച്ചിട്ടുണ്ട്.
ഇത്തരത്തിലുള്ള സ്ഥാപനങ്ങള്‍ക്കെതിരേ നിയമനടപടി സ്വീകരിക്കുമെന്ന് സംസ്ഥാന സെക്രട്ടറി കെ.എം രവീന്ദ്രന്‍, സംസ്ഥാന പ്രസിഡന്റ് കെ. ചന്ദ്രന്‍, മറ്റ് ഭാരവാഹികളായ ജോണ്‍സണ്‍ കുടിയാന്‍മല, കമല ആര്‍. പണിക്കര്‍, ഒ.കെ വത്സല, ഷൈജ സുരേഷ്, പി.വി വാസു, കെ. ബിന്ദു എന്നിവര്‍ പറഞ്ഞു.