തിരുവനന്തപുരം: ശബരിമല സ്ത്രീ പ്രവേശനവുമായി ബന്ധപ്പെട്ട പ്രതിസന്ധിയുടെ പൂര്‍ണ ഉത്തരവാദിത്തം കേരള സര്‍ക്കാറിനാണെന്ന് പ്രതിപക്ഷ നേതാവ് രമേശ് ചെന്നിത്തല. ആര്‍.എസ്.എസും ബി.ജെ.പിയും ഈ വിഷയത്തില്‍ എടുക്കുന്ന നിലപാട് തികച്ചും അവസരവാദപരമാണെന്നും ചെന്നിത്തല വാര്‍ത്താസമ്മേളനത്തില്‍ പറഞ്ഞു.

ശബരിമലയുടെ പേരില്‍ ബി.ജെ.പി മുതലെടുപ്പ് നടത്തേണ്ട. അതിന്റെ പേരില്‍ അക്രമങ്ങള്‍ക്ക് ബി.ജെ.പയോ സി.പി.എമ്മോ ശ്രമിച്ചാല്‍ യു.ഡി.എഫ് എതിര്‍ക്കുമെന്നും അദ്ദേഹം മുന്നറിയിപ്പു നല്‍കി. അതേസമയം, ശബരി മല വിഷയത്തില്‍ യു.ഡി.എഫ് അക്രമ സമരങ്ങളിലേക്കില്ലെന്ന് അദ്ദേഹം വ്യക്തമാക്കി.

ശബരിമല വിഷയത്തില്‍ യു.ഡി.എഫ് വിശ്വാസികള്‍ക്കൊപ്പമാണെന്ന് അദ്ദേഹം ആവര്‍ത്തിച്ചു. യു.ഡി.എഫ് സര്‍ക്കാറിന്റെ കാലത്ത് ദേവസ്വം ബോര്‍ഡ് വിശ്വാസികളുടെ വികാരത്തിനനുസരിച്ചാണ് കോടതിയില്‍ സത്യവാങ്മൂലം നല്‍കിയത്. ആ നിലപാടില്‍ ഇപ്പോഴും യു.ഡി.എഫ് ഉറച്ചു നില്‍ക്കുന്നു. എന്നാല്‍ ഇടതു സര്‍ക്കാര്‍ വന്നപ്പോള്‍ ദേവസ്വം ബോര്‍ഡ് നിലപാട് മാറ്റിയെന്നും അദ്ദേഹം കുറ്റപ്പെടുത്തി.

ബ്രൂവറി അഴിമതി അന്വേഷിക്കണമെന്ന് ചെന്നിത്തല ആവശ്യപ്പെട്ടു. അന്വേഷണം നടത്താത്തത് ഭയം കൊണ്ടാണെന്ന് അദ്ദേഹം ആരോപിച്ചു.