വിയന്ന: ഇറാന്റെ ഗ്രേസ് 1 എണ്ണക്കപ്പല്‍ ബ്രിട്ടന്‍ പിടിച്ചെടുത്തത് 2015ലെ ആണവകരാറിന്റെ ലംഘനമാണെന്ന് വിയന്നയില്‍ ചേര്‍ന്ന, 2015 ആണവകരാറില്‍ ഒപ്പിട്ട യു.എസ് ഒഴികെയുള്ള രാജ്യങ്ങളുടെ പ്രത്യേക യോഗത്തില്‍ ഇറാന്‍. ബ്രിട്ടീഷ് കപ്പല്‍ പിടിച്ചെടുക്കാന്‍ കാരണമായത് ഇതാണെന്നും ഇറാന്‍ ഉപ വിദേശകാര്യ മന്ത്രി അബ്ബാസ് അരാഗ്ചി യോഗത്തില്‍ വ്യക്തമാക്കി. ഇറാന്‍ എണ്ണ കയറ്റുമതി ചെയ്യുന്നതിന് ജെ.സി.പി.ഒ.എ (സംയുക്ത സത്വര ആക്ഷന്‍ പദ്ധതി) അംഗങ്ങളായ രാജ്യങ്ങള്‍ തടസ്സമുണ്ടാക്കരുതെന്നും അദ്ദേഹം ആവശ്യപ്പെട്ടു.
2018 മേയില്‍ ആണവകരാറില്‍ നിന്ന് യു.എസ് പിന്‍വാങ്ങുകയും ഇറാനെതിരേ ഉപരോധമേര്‍പ്പെടുത്തുകയും ചെയ്തത് പ്രതിസന്ധി നേരിടുന്ന ഇറാന്‍ സമ്പദ്ഘടനയെ കൂടുതല്‍ തളര്‍ത്തുന്ന സാഹചര്യത്തിലാണ് ബ്രിട്ടന്‍, ഫ്രാന്‍സ്, ജര്‍മനി, റഷ്യ, ചൈന, ഇറാന്‍ എന്നീ രാജ്യങ്ങളുടെ പ്രതിനിധികള്‍ വിയന്നയില്‍ അടിയന്തര യോഗം ചേര്‍ന്നത്.
അതേസമയം ജെ.സി.പി.ഒ.എയുടെ കരാറിലുള്ള മറ്റു കാര്യങ്ങള്‍ ഇറാന്‍ എത്രത്തോളം നടപ്പാക്കിയെന്ന് തങ്ങള്‍ പരിശോധിക്കുമെന്ന് യൂറോപ്യന്‍ യൂനിയന്‍ വിദേശനയ വിഭാഗം പറഞ്ഞു.
യു.എസിന്റെ ഉപരോധത്തെ മറികടന്ന് ഇറാന് എണ്ണ കയറ്റുമതി ചെയ്യാനായി ഫ്രാന്‍സ്, ബ്രിട്ടന്‍, ജര്‍മനി എന്നീ രാജ്യങ്ങള്‍ ചേര്‍ന്ന് ഇന്‍സ്‌ടെക്‌സ് എന്ന പേരില്‍ പ്രത്യേക വ്യാപാര മാര്‍ഗം തുറന്നുകൊടുത്തിരുന്നു. ഇതിലൂടെ യൂറോപ്യന്‍ യൂനിയന്‍ രാജ്യങ്ങളുമായി വ്യാപാരം നടത്താം. എന്നാല്‍ ഇതുകൊണ്ട് ഇറാന് വിലയ ഗുണമില്ലെന്നും എണ്ണ കയറ്റുമതി നടക്കുന്നില്ലെന്നും ഇറാന്‍ പറഞ്ഞു.
ചര്‍ച്ച വളരെ നല്ല രീതിയിലായിരുന്നുവെന്നും എന്നാല്‍ ഇതുകൊണ്ട് എല്ലാം പരിഹരിച്ചെന്നു പറയാനാവില്ലെന്നും ഇറാന്‍ ഉപ വിദേശകാര്യ മന്ത്രി അബ്ബാസ് അരാഖി യോഗത്തിനു ശേഷം പറഞ്ഞു. യു.എസ് ഉപരോധം ആണവകരാര്‍ നടപ്പാക്കുന്നതിനെ ബാധിച്ചതായും ബന്ധപ്പെട്ട എല്ലാ രാജ്യങ്ങളും ഇതു സമ്മതിച്ചതായും റഷ്യന്‍ അംബാസിഡര്‍ മിഖായേല്‍ ഉല്യാനോവ് പറഞ്ഞു.