ന്യൂഡല്‍ഹി: ഏറെ കാലത്തിന് ശേഷം ഡേവിസ് കപ്പ് ടെന്നിസില്‍ പങ്കെടുക്കുന്നതിനായി ഇന്ത്യന്‍ ടീം പാകിസ്താനിലേക്ക് പോകുമെന്ന് ഓള്‍ ഇന്ത്യ ടെന്നിസ് അസോസിയേഷന്‍ സെക്രട്ടറി ഹിറോണമൊയ് ചാറ്റര്‍ജി അറിയിച്ചു.

സെപ്റ്റംബറില്‍ നടക്കുന്ന മത്സരങ്ങള്‍ക്ക് വേണ്ടിയാണ് ഇന്ത്യന്‍ ടീം പാകിസ്താനിലേക്ക് പോകുന്നത്. 55 വര്‍ഷങ്ങള്‍ക്ക് ശേഷമാണ് ഇന്ത്യന്‍ ടെന്നിസ് ടീം പാകിസ്താനിലേക്ക് പോകുന്നത്. ഇത് രണ്ട് രാജ്യങ്ങള്‍ തമ്മിലുള്ള ടൂര്‍ണമെന്റ് അല്ലെന്നും ഒരു ലോകകപ്പ് ആണെന്നും അതുകൊണ്ട് ഇന്ത്യന്‍ ടീം പാകിസ്താനില്‍ പോകുമെന്നും ടെന്നിസ് അസോസിയേഷന്‍ സെക്രട്ടറി പറഞ്ഞു.

ഇന്ത്യന്‍ സര്‍ക്കാരുമായി ഇതുവരെ ബന്ധപ്പെട്ടിട്ടില്ലെങ്കിലും ഐ.ഒ.സിയുടെ നിയമങ്ങള്‍ പാലിക്കേണ്ടണ്ടതിനാല്‍ ഇന്ത്യ പാക്കിസ്താനില്‍ കളിക്കുമെന്നും സെക്രട്ടറി വ്യക്തമാക്കി. ഇതുപ്രകാരം ടീമിനൊപ്പം സെക്രട്ടറിയും ആറു കളിക്കാരും മറ്റു സപ്പോര്‍ട്ടിങ് സ്റ്റാഫുകളും പാകിസ്താനിലേക്ക് പോകും. അവസാനമായി ഇന്ത്യയും പാക്കിസ്താനും ഡേവിസ് കപ്പില്‍ ഏറ്റുമുട്ടിയത് 2006ലായിരുന്നു. അന്ന് മുംബൈയില്‍ വച്ച് നടന്ന മത്സരത്തില്‍ ഇന്ത്യ 3-2ന് ജയിച്ചിരുന്നു. രാജ്യങ്ങള്‍ തമ്മിലുള്ള രാഷ്ട്രീയ മാനത്തിന് ഇതുമായി ബന്ധമില്ലെന്നും ചാറ്റര്‍ജി വ്യക്തമാക്കി. അടുത്ത മാസമാണ് പാക്കിസ്താനില്‍ ടൂര്‍ണമെന്റ് നടക്കുന്നത്.