തൊടുപുഴ: നെടുങ്കണ്ടം ഉരുട്ടിക്കൊലക്കേസില്‍ രാജ്കുമാറിന്റെ മൃതദേഹം നാളെ (തിങ്കളാഴ്ച) വീണ്ടും പോസ്റ്റ്‌മോര്‍ട്ടം ചെയ്യും. സംഭവത്തില്‍ വീണ്ടും പോസ്റ്റമോര്‍ട്ടം ചെയ്യണമെന്നാവശ്യപ്പെട്ട് ജുഡിഷ്യല്‍ കമ്മിഷന്‍ നേരത്തെ സര്‍ക്കാരിനു കത്തയച്ചിരുന്നു.

ആദ്യം നടത്തിയ പോസ്റ്റ്‌മോര്‍ട്ടത്തില്‍ നിറയെ അപാകതകളുണ്ടെന്ന് നേരത്തെ കണ്ടെത്തിയിരുന്നു. മറവു ചെയ്ത് മുപ്പത്തിഏഴ് ദിവസത്തിനുശേഷമാണ് മൃതദേഹം പുറത്തെടുത്ത് വീണ്ടും പോസ്റ്റ്‌മോര്‍ട്ടത്തിന് വിധേയമാക്കുന്നത്.

മരിച്ച രാജ്കുമാറിന്റെ വാരിയെല്ലുകള്‍ക്കേറ്റ പരുക്ക് പൊലിസ് മര്‍ദനത്തില്‍ ഏറ്റതാണോയെന്നാണ് പ്രധാനമായും പരിശോധിക്കുക. വിശദമായ പരിശോധനകള്‍ നടത്താന്‍ ഫോറന്‍സിക് വിഭാഗത്തിന്റെയും മറ്റു സംഘങ്ങളുടെയും സഹായം അഭ്യര്‍ഥിച്ചിട്ടുണ്ട്.