ബെയ്ജിങ്: ഇറക്കുമതി തീരുവ ചുമത്തിയതുമായി ബന്ധപ്പെട്ടുള്ള നയതന്ത്ര വിള്ളലിനിടെ ചൈന സന്ദര്‍ശിച്ച് യു.എസ് വിദേശകാര്യ സെക്രട്ടറി മൈക് പോംപിയോ. ഉത്തര കൊറിയന്‍ സന്ദര്‍ശനത്തിന് പിന്നാലെയാണ് അദ്ദേഹം ചൈനയിലെത്തിയത്. വിദേശകാര്യ മന്ത്രി വാങ് യിയുമായി പോംപിയോ കൂടിക്കാഴ്ച നടത്തി. തങ്ങളുടെ ഉല്‍പ്പന്നങ്ങള്‍ക്ക് ഇറക്കുമതി തീരുവ ചുമത്തിയ നടപടിയെയും യു.എസ് രാഷ്ട്രീയത്തില്‍ ഇടപെടുന്നുണ്ടെന്ന ആരോപണത്തെയും വാങ് യി കുറ്റപ്പെടുത്തി.
ഉത്തരകൊറിയയുടെ ആണവ നിരായുധീകരണമായിരുന്നു ഇരുവരുടെയും ചര്‍ച്ചയിലെ പ്രധാന വിഷയം. ആണവ പരീക്ഷണ കേന്ദ്രങ്ങളില്‍ പരിശോധന നടത്താന്‍ കിം ജോങ് ഉന്‍ സമ്മതിച്ചുവെന്ന് പോംപിയോ പറഞ്ഞു. പങ്കി റി ആണവ കേന്ദ്ര സന്ദര്‍ശനത്തിനാണ് അനുമതി നല്‍കിയത്. ആണവ നിരായുധീകരണത്തിന് ചൈനയുടെ പിന്തുണ ലഭിക്കുമെന്നാണ് യു.എസിന്റെ പ്രതീക്ഷ. ഡൊണാള്‍ഡ് ട്രംപുമായുള്ള രണ്ടാം ഉച്ചകോടി തീരുമാനത്തെ അദ്ദേഹം ഇന്നലെയും ട്വിറ്ററിലൂടെ ആവര്‍ത്തിച്ചു.
വ്യാപാര യുദ്ധമാണ് യു.എസ് ചൈന ഇടയിലെ നയതന്ത്ര സഹകരണങ്ങള്‍ക്ക് തടസമാവുന്നത്. ചൈനയില്‍ നിന്ന് ഇറക്കുമതി ചെയ്യുന്ന ഉല്‍പ്പന്നങ്ങളില്‍ പകുതിക്കും യു.എസ് തീരുവ ചുമത്തിയിരുന്നു. കൂടാതെ മുഴുവന്‍ ഉല്‍പ്പന്നങ്ങള്‍ക്കും തീരുവ ചുമത്തുമെന്ന് ഭീഷണിയും മുഴക്കിയിരുന്നു.
യു.എസ് തീരുവക്ക് അതേ നാണയത്തില്‍ ചൈന തിരിച്ചടി നല്‍കിയിരുന്നു. വ്യാപാര യുദ്ധത്തിന് യു.എസ് തുടക്കമിട്ടെന്നാണ് ചൈനയുടെ വാദം.