കോഴിക്കോട്: സഞ്ചാരി വെറും സഞ്ചാരമല്ല. യാത്രകളില്‍ നന്മയുടെ കണ്ണുതുറന്ന അവര്‍ പലതും കാണുന്നുണ്ട്, പലതും അറിയുന്നുണ്ട്. പാവപ്പെട്ട കുഞ്ഞുങ്ങളുടെ സ്വപ്നം തെട്ടറിഞ്ഞ് അവര്‍ക്ക് ഒരു സന്തോഷം നല്‍കുകയാണ് സഞ്ചാരി ഫേസ്ബുക്ക് കൂട്ടായ്മ. പ്രകൃതിക്കൊപ്പമുള്ള സഞ്ചാരത്തിലൂടെ കേരളത്തില്‍ സജീവമായ സഞ്ചാരി ഫേസ്ബുക്ക് കൂട്ടായ്മയുടെ പഠനോപകരണങ്ങളുടെ വിതരണത്തിന് തുടക്കമായി. സ്വദേശത്തും വിദേശത്തും നന്മയുടെ ആശാകിരണങ്ങള്‍ നീട്ടുന്ന കൈകളുണ്ടെന്ന് തെളിയിച്ചാണ് ഈ കൂട്ടായ്മ സദ്പ്രവര്‍ത്തനം.
'നമ്മുടെ കുഞ്ഞിനൊപ്പം അവരും പുഞ്ചിരിക്കട്ടെ' സന്ദേശമുയര്‍ത്തി സഞ്ചാരി നടപ്പിലാക്കുന്ന സ്‌കൂള്‍ വിദ്യാര്‍ഥികള്‍ക്കുള്ള പഠനോപകരണങ്ങളുടെ വിതരണോദ്ഘാടനം ജില്ലാ കലക്ടര്‍ യു.വി ജോസ് നിര്‍വഹിച്ചു. ജില്ലയിലെ വിവിധ സ്‌കൂള്‍ വിപണികളിലും കടകളിലും പ്രത്യേകം ബോക്‌സുകള്‍ സ്ഥാപിച്ച് പഠനോപകരണങ്ങള്‍ ശേഖരിക്കുകയായിരുന്നു. സ്വന്തം കുട്ടികള്‍ക്ക് പഠനോപകരണങ്ങള്‍ വാങ്ങാനെത്തുന്ന രക്ഷിതാക്കളെ കടയിലെ ജീവനക്കാര്‍ സ്ഥാപിച്ച ബോക്‌സിന്റെ ഉദ്ദേശ്യം പറഞ്ഞുകൊടുക്കുകയും പദ്ധതിയില്‍ പങ്കാളികളാക്കുകയും ചെയ്തു. സ്വന്തം കുഞ്ഞിനെ പോലെ തന്നെ മറ്റു നിര്‍ധനരായ കുഞ്ഞുങ്ങള്‍ക്ക് ഒരു നേരത്തെ സന്തോഷം നല്‍കാന്‍ ആഗ്രഹിക്കുന്ന മറ്റു രക്ഷിതാക്കളും സന്മനസുള്ളവരെയും തിരിച്ചറിയാനും ഇതുവഴി സാധിച്ചു.
ബോക്‌സുകളില്‍ സ്‌കൂള്‍ ബാഗ്, കുട, ഇന്‍സ്ട്രുമെന്റ് ബോക്‌സ്, പേന, പെന്‍സില്‍, നോട്ട്ബുക്കുകള്‍ തുടങ്ങിയ പഠനോപകരണങ്ങള്‍ നിക്ഷേപിച്ച് പൊതുജനങ്ങള്‍ക്കും ഉദ്യമത്തില്‍ പങ്കാളികളാകാന്‍ അവസരം നല്‍കിയിരുന്നു. ഇതിനു പുറമെ സഞ്ചാരി അംഗങ്ങളുടെ സ്‌പോണ്‍സര്‍ഷിപ്പും സന്നദ്ധ സംഘടനകളുടെയും സ്ഥാപനങ്ങളുടെയും സഹകരണവും കൂടിയായതോടെ നൂറുക്കണക്കിന് വിദ്യാര്‍ഥികള്‍ക്കാണ് സ്‌കൂള്‍ പഠനത്തിനാവശ്യമായ മുഴുന്‍ സാധനങ്ങളും വിതരണം ചെയ്യാന്‍ കഴിഞ്ഞത്. പഠനോപകരണങ്ങള്‍ ശേഖരിക്കാന്‍ പ്രത്യേകം ടീമിനെ തയാറാക്കിക്കൊണ്ടായിരുന്നു സഞ്ചാരിയുടെ പ്രവര്‍ത്തനം.
വിദ്യാഭ്യാസ വകുപ്പുമായി ബന്ധപ്പെട്ട് പിന്നോക്ക മേഖലയിലെ സ്‌കൂളുകളെ തിരഞ്ഞെടുക്കുകയും പ്രധാനാധ്യാപകര്‍ വിദ്യാര്‍ഥികളുടെ ലിസ്റ്റ് നല്‍കുകയുമായിരുന്നു. സഞ്ചാരി കൂട്ടായ്മ കഴിഞ്ഞവര്‍ഷം മുതലാണ് പദ്ധതി ആരംഭിച്ചത്. ഇത്തവണ സംസ്ഥാനത്തൊട്ടാകെ ആയിരത്തിലധികം വിദ്യാര്‍ഥികള്‍ക്ക് കിറ്റുകള്‍ സമ്മാനിക്കാന്‍ കഴിയുമെന്ന് സഞ്ചാരി കോര്‍ ടീം അംഗങ്ങള്‍ അറിയിച്ചു. ഇന്ത്യയിലും വിദേശത്തുമായി 22ഓളം യൂനിറ്റുകളുള്ള ഫേസ്ബുക്കിലെ യാത്രാ സ്‌നേഹികളുടെ കൂട്ടായ്മയാണ് സഞ്ചാരി. ഫേസ്ബുക്കും മറ്റു സമൂഹമാധ്യമ കൂട്ടായ്മകളും നേരം പോക്കല്ലെന്നും സാമൂഹിക പ്രവര്‍ത്തനങ്ങളുടെ പുതിയ വാതായനങ്ങല്‍ തുറന്നിടാനും കഴിയുമെന്ന് കാണിച്ചുകൊടുക്കുകയാണ് ഈ സഞ്ചാരിക്കൂട്ടം. ജില്ലാ കലക്ടറുടെ ചേംബറില്‍ നടന്ന പരിപാടിയില്‍ സഞ്ചാരി ടീം അംഗങ്ങളായ പി. സുരേന്ദ്രന്‍, മുനീര്‍ ഹുസൈന്‍, ധര്‍മരാജ് അമ്പാടി, പി.വി നജീബ്, ഷമീര്‍ ദിഗേ, ഷൈനീജ് റഹ്്മാന്‍, ഹാഫിസ് പൊന്നേരി, സുനീഷ് കടലുണ്ടി സംബന്ധിച്ചു.