കാര്യമ്പാടി: ഇരുനൂറിലധികം വര്‍ഷം പഴക്കമുള്ളതും സമസ്തക്ക് കീഴില്‍ ജില്ലയിലെ തന്നെ ആദ്യ ഹനഫീ പള്ളിയുമായ കാര്യമ്പാടി ഹിദായത്തുല്‍ ഇസ്്‌ലാം സംഘം ഹനഫീ മഹല്ലിനെ ഭിന്നിപ്പിക്കാന്‍ ചില തല്‍പര കക്ഷികള്‍ ശ്രമിക്കുന്നതായി മഹല്ല് പ്രസിഡന്റ് പി.എം ലിയാഖത്ത് അലി ഹാജി, സെക്രട്ടറി എം അബ്ദുല്‍ കരീം എന്നിവര്‍ വാര്‍ത്താക്കുറിപ്പില്‍ ആരോപിച്ചു. നൂറ്റാണ്ടുകളായി ഹനഫി, ഷാഫി വിഭാഗത്തില്‍പ്പെട്ടവര്‍ ഈ മസ്ജിദില്‍ ആരാധനയിലും മറ്റും ഒരേ മനസ്സോടെ പങ്കെടുക്കുന്നുണ്ട്. മഹല്ലിന് കീഴില്‍ 300ഓളം മുസ്്‌ലിം കുടുംബങ്ങളാണുള്ളത്.
ഇതില്‍ 50ഓളം ഷാഫി മദ്ഹബ് പിന്തുടരുന്ന കുടുംബങ്ങളുമുണ്ട്. എന്നാല്‍ കഴിഞ്ഞ കമ്മിറ്റി തെരഞ്ഞെടുപ്പിന് ശേഷം ചില അധികാര മോഹികള്‍ ഹനഫീ മദ്ഹബില്‍പ്പെട്ടവര്‍ ഷാഫി മദ്ഹബില്‍പെട്ടവരെ പള്ളിയില്‍വച്ച് തങ്ങളുടെ മതപഠനങ്ങളും മറ്റു ആരാധനാ വിശ്വാസങ്ങള്‍ക്കും തടസ്സം നില്‍ക്കുന്നുവെന്നും മറ്റുമുള്ള വ്യാജ പ്രചാരണങ്ങള്‍ നടത്തുകയാണ്. ഇവര്‍ക്കായി കാന്തപുരം വിഭാഗത്തിന്റെ സഹായത്തോടെ പുതിയ പള്ളി പണിയാനുള്ള ശ്രമം നടക്കുന്നുണ്ട് ഇതിന്റെ ഭാഗമായി നാട്ടുകാരില്‍ നിന്നും പിരിവെടുക്കുന്നതും മറ്റും ആരംഭിച്ചിട്ടുണ്ട്. രണ്ട് രീതിയലാണ് ഇതിനായുള്ള നോട്ടീസുകള്‍ അച്ചടിച്ചിരിക്കുന്നത്.
കാന്തപുരം ഒഴികെയുള്ള വിഭാഗങ്ങളിലെ മഹല്ലുകളില്‍ മദ്ഹബ് വിഷയമാക്കിയും മറ്റ് മഹല്ലുകളില്‍ എ.പി വിഭാഗത്തിന് പള്ളി നിര്‍മിക്കാനെന്നും കാണിച്ചാണ് പിരിവ് നടക്കുന്നത്.
എന്നാല്‍ ഇത്തരത്തിലുള്ള യാതൊരു പ്രശ്‌നങ്ങളോ ബുദ്ധിമുട്ടുകളോ ഇല്ലാതെ ഇരുവിഭാഗക്കാരും നല്ല മനസ്സോടെ ആരാധന നടത്തുന്ന പള്ളിയില്‍ ചില തല്‍പ്പര കക്ഷികളുടെ അധികാര മോഹങ്ങള്‍ക്കും വിഭാഗീയത സൃഷ്ടിക്കുന്നതിനും വേണ്ടിയാണ് ഈ കള്ളപ്രചരണങ്ങള്‍ നടത്തുന്നത് ഇത് പൊതുസമൂഹം തിരിച്ചറിയണമെന്നും ഭാരവാഹികള്‍ വാര്‍ത്താക്കുറിപ്പില്‍ പറഞ്ഞു.