കുറ്റ്യാടി: തീക്കുനിയില്‍ ഹോട്ടല്‍ തൊഴിലാളിക്ക് മര്‍ദനമേറ്റതായി പരാതി. ടീ ടൈം ഹോട്ടലില്‍ ജോലി ചെയ്യുന്ന പൂമുഖത്തെ കല്ലില്‍ക്കുനി ത്വാഹ (25) യ്ക്കാണ് മര്‍ദനമേറ്റത്.
സാരമായി പരുക്കേറ്റ നിലയില്‍ ഇയാളെ കുറ്റ്യാടി ഗവ. താലൂക്ക് ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസം രാത്രി ഭക്ഷണം കഴിക്കനെത്തിയവരാണ് ബില്‍ തുക കൂടുതലാണെന്നാരോപിച്ച് അക്രമിച്ചതെന്ന് ത്വാഹ പൊലിസിന് നല്‍കിയ മൊഴിയില്‍ പറയുന്നു. വയറ്റത്തും നെഞ്ചിലും പിറകു വശത്തുമാണ് മര്‍ദനമേറ്റത്. മര്‍ദനത്തെ തുടര്‍ന്ന് അവശനായ യുവാവിനെ നാട്ടുകാര്‍ ചേര്‍ന്നാണ് ആശുപത്രിയില്‍ എത്തിച്ചത്. അക്രമികളുടെ പേരില്‍ കുറ്റ്യാടി പൊലിസ് കേസെടുത്തു. തൊഴിലാളിയായ യുവാവിനെ അകാരണമായി മര്‍ദിച്ചതില്‍ പ്രതിഷേധിച്ച് വ്യാപാരികള്‍ ഉച്ചവരെ ടൗണില്‍ ഹര്‍ത്താല്‍ ആചരിച്ചു. സംഭവത്തെ തീക്കുനി ശാഖാ മുസ്‌ലിം ലീഗ് കമ്മിറ്റി അപലപിച്ചു. ബഷീര്‍ മാണിക്കോത്ത്, പി.പി റഷീദ്, ടി.കെ മഹമൂദ്, മുന്നൂല്‍ മുജീബ്, ചാലില്‍ സിയാദ്, വി.പി ഹമീദ് സംസാരിച്ചു.