മലപ്പുറം: തെളിവെടുപ്പിനിടെ പൊലിസിന്റെ പിടിയില്‍ നിന്ന് രക്ഷപ്പെട്ട ലഹരിമരുന്ന് കേസിലെ പ്രതിയെ പിടികൂടുന്നതിനിടെ എക്‌സൈസ് റേഞ്ച് ഓഫിസര്‍ക്ക് വെടിയേറ്റു. വണ്ടൂര്‍ വാണിയമ്പലത്തുവെച്ചാണ് സംഭവം. എക്‌സൈസ് നിലമ്പൂര്‍ റെയ്ഞ്ച് ഓഫിസര്‍ മനോജിന്റെ കാലിനാണ് വെടിയേറ്റത്. മയക്കുമരുന്ന് കേസിലെ പ്രതി ജോര്‍ജ് കുട്ടിയാണ് റെയ്ഞ്ച് ഓഫീസര്‍ക്ക് നേരെ വെടിയുതിര്‍ത്തത്. ചൊവ്വാഴ്ച പുലര്‍ച്ചെയാണ് സംഭവം. വെടിയേറ്റ മനോജിനെ വണ്ടൂരിലെ ആശുപത്രിയില്‍ പ്രവേശിപ്പിച്ച് അടിയന്തര ശസ്ത്രക്രിയ നല്‍കി. തിരുവനന്തപുരത്ത് കോടികളുടെ ഹാഷിസ് പിടിച്ച കേസില്‍ മുങ്ങിയ ജോര്‍ജ്കുട്ടി എന്ന പ്രതി വാണിയമ്പലത്തെ ഭാര്യാ വീട്ടിലെത്തിയപ്പോഴോണ് വിവരമറിഞ്ഞ് എക്സൈസ് സംഘം ഇയാളെ പിടികൂടാനെത്തിയത്. വാതില്‍ തുറന്ന ഉടന്‍ നാലു പ്രാവശ്യം വെടി വെക്കുകയായിരുന്നു. പ്രതിയെ പിന്നീട് സാഹസികമായി പിടികൂടി. നേരത്തെ എക്‌സൈസിന്റെ തെളിവെടുപ്പിനിടെയാണ് പ്രതി പൊലിസിന്റെ പിടിയില്‍ നിന്ന് രക്ഷപ്പെട്ടത്.