ലക്‌നോ: യു.പി മുഖ്യമന്ത്രി യോഗി ആദിത്യനാഥ് അയോധ്യയിലെത്തി. മുഖ്യമന്ത്രിയായശേഷം യോഗി ആദിത്യനാഥ് നടത്തുന്ന ആദ്യ അയോധ്യ സന്ദര്‍ശനമാണിത്. ബാബരി മസ്ജിദ് കേസില്‍ മുതിര്‍ന്ന ബി.ജെ.പി നേതാക്കള്‍ക്കെതിരെ കോടതി ക്രിമിനല്‍ ഗൂഢാലോചനക്കുറ്റം ചുമത്തിയതിന് പിന്നാലെയാണ്  ആദിത്യനാഥിന്റെ അയോധ്യ സന്ദര്‍ശനമെന്നത് ശ്രദ്ധയമാണ്. 2019 ലെ പാര്‍ലമെന്റ് തെരഞ്ഞെടുപ്പ് ലക്ഷ്യം വെച്ച് തങ്ങളുടെ പഴയ ആയുധമായ ബാബരി മസ്ജിദ് അയോധ്യ പ്രശ്‌നം വീണ്ടും പൊട്ടിത്തട്ടിയെടുക്കാനുള്ള ഒരുക്കത്തിലാണോ ബി.ജെ.പി എന്നാണ് രാഷട്രീയ നിരീക്ഷകര്‍ ഉറ്റുനോക്കുന്നത്.

 ബാബരി മസ്ജിദ് കേസില്‍ കഴിഞ്ഞ ദിവസം എല്‍.കെ അദ്വാനി, മുരളി മനോഹര്‍ ജോഷി, ഉമാഭാരതി എന്നിവര്‍ക്കെതിരെ പ്രത്യേക സി.ബി.ഐ കോടതി ക്രിമിനല്‍ ഗൂഢാലോചനക്കുറ്റം ചുമത്തിയിരുന്നു. കോടതിയില്‍ ഹാജരാവാനെത്തിയ നേതാക്കളെ ബെക്കെയുമായാണ് ആദിത്യനാഥ് സ്വീകരിച്ചത്. കോടതിയിലേറ്റ തിരിച്ചടിയെ നിസ്സാരവത്ക്കരിക്കാനുള്ള ശ്രമത്തിലാണ് ബി.ജെ.പി നേതാക്കള്‍. തങ്ങളുടെ നേതാക്കള്‍ തെറ്റു ചെയ്യാത്തവരാണെന്നും അവര്‍ കളങ്കരഹിതരായി തന്നെ തിരിച്ചുവരുമെന്നാണ് ബി.ജെ.പി നേതൃത്വത്തിന്റെ വാദം. ഇക്കാര്യം  അണികളെ ബോധ്യപ്പെടുത്താനും അവര്‍ ശ്രമിക്കുന്നുണ്ട്. എന്നിവര്‍ക്ക് ജാമ്യവും അനുവദിച്ചു.

കഴിഞ്ഞയാഴ്ച ന്യൂസ് 18ന് നല്‍കിയ അഭിമുഖത്തില്‍ രാമക്ഷേത്രം നിര്‍മിക്കണമെന്ന് ആദിതനാഥ് ആവശ്യപ്പെട്ടിരുന്നു. ഇന്ത്യന്‍ മുസ്ലിങ്ങളുടെ പൂര്‍വ്വികര്‍ ബാബറോ ഔറംഗസീബോ അല്ലെന്നും ഇന്ത്യയുടെ നല്ലഭാവിക്കായി ചരിത്രപരമായ തെറ്റുകള്‍ തിരുത്തപ്പെടണമെന്നും അദ്ദഹം അഭിമുഖത്തില്‍ പറഞ്ഞു. യു.പി സര്‍ക്കാര്‍ ബാബരി കേസില്‍ കക്ഷിയല്ല. പരസ്പര ചര്‍ച്ചയിലൂടെ മാത്രമേ പ്രശ്‌ന പരിഹാരമാവൂ എന്നും അദ്ദേഹം ചൂണ്ടിക്കാട്ടി. അതിനാവശ്യമായ എല്ലാ പിന്തുണയും സര്‍ക്കാറിന്റെ ഭാഗത്തു നിന്നുണ്ടാവുമെന്നും അദ്ദേഹം കൂട്ടിച്ചേര്‍ത്തു.

അതേസമയം, കേന്ദ്രമന്ത്രി ഉമാഭാരതി രാജിവെക്കണമെന്ന ആവശ്യവുമായി കോണ്‍ഗ്രസ് രംഗത്തെത്തിയിട്ടുണ്ട്.