നിലമ്പൂര്‍: അസാപ് പരിശീലനം കഴിഞ്ഞു മടങ്ങുന്നതിനിടെ ഗുഡ്‌സ് ജീപ്പിടിച്ച് മൂന്നു വിദ്യാര്‍ഥിനികള്‍ക്കു പരുക്കേറ്റു. നിലമ്പൂര്‍ മാനവേദന്‍ സ്‌കൂള്‍, എരുമമുണ്ട നിര്‍മല ഹയര്‍സെക്കന്‍ഡറി സ്‌കൂള്‍ എന്നിവിടങ്ങളിലെ പ്ലസ്ടു വിദ്യാര്‍ഥിനികളായ മൈലാടി പുത്തലത്ത് മഞ്ജുലാലിന്റെ മകള്‍ ഭവ്യ, അകമ്പാടം പൂക്കോടന്‍ റിയാസിന്റെ മകള്‍ റിന്‍ഷ, എളമ്പിലാക്കോട് പൂവന്‍ ചന്ദ്രന്റെ മകള്‍ പ്രീതു എന്നിവര്‍ക്കാണ് പരുക്കേറ്റത്.
കൂടെയുണ്ടായിരുന്ന സജ്‌ന, നിസ്‌റിന്‍ എന്നിവര്‍ പരുക്കുകളില്ലാതെ രക്ഷപ്പെട്ടു. ഇന്നലെ വൈകിട്ട് അഞ്ചോടെ നിലമ്പൂര്‍ കരിമ്പുഴയിലുള്ള കെ.ടി.ഡി.സി ഹോട്ടലില്‍ അസാപ് പരിശീലനം കഴിഞ്ഞു കരിമ്പുഴയിലേക്കു ബസ് കയറാനായി നടന്നുപോകുമ്പോഴാണ് പിന്നില്‍നിന്നു വന്ന ഗുഡ്‌സ് ജീപ്പ് ഇവരെ ഇടിച്ചുതെറിപ്പിച്ചത്. നിയന്ത്രണംവിട്ട ഗുഡ്‌സ് ജീപ്പ് സമീപത്തെ ചീനി മരത്തില്‍ ഇടിച്ചാണ് നിന്നത്.
അസാപ് ട്രെയിനര്‍മാരും നാട്ടുകാരും ചേര്‍ന്നാണ് ഇവരെ നിലമ്പൂര്‍ ജില്ലാ ആശുപത്രിയില്‍ എത്തിച്ചത്. 13ന് തുടങ്ങിയ പരിശീലന ക്ലാസ് ഇന്നലെ പൂര്‍ത്തിയാക്കി വീടുകളിലേക്കു മടങ്ങുന്നതിനടെയാണ് അപകടം.