ജിദ്ദ: മക്കയിലെ ജിഅറാനയില്‍ സഊദി രഹസ്യ പൊലിസ് നടത്തിയ പരിശോധനയില്‍ വ്യാജ സംസം ഫാക്ടറി കണ്ടെത്തി. ഒറിജിനല്‍ സംസം കാനിന്റെയും സ്റ്റിക്കറിന്റെയും ഡ്യൂപ്ലിക്കറ്റുകള്‍ ഇറക്കി അതില്‍ സാധാരണ വെള്ളം നിറച്ചാണ് സംസം എന്ന വ്യാജേന വില്‍പന നടത്തിയിരുന്നത്.

ഇതുമായി ബന്ധപ്പെട്ട് നാലു യെമനി സംഘത്തെയും പൊലിസ് പിടികൂടി. വിദേശ യാത്രക്കാര്‍ക്ക് വിമാനത്തില്‍ സംസം കൊണ്ട് പോകാനുള്ള പാക്കറ്റുകളിലാണു ഇവ നിറച്ചിരിക്കുന്നത്. ധാരാളം ഉംറ തീര്‍ത്ഥാടകര്‍ ഇവരുടെ വഞ്ചനയിലകപ്പെട്ടിട്ടുണ്ടെന്നാണു റിപ്പോര്‍ട്ട്. എയര്‍പ്പോര്‍ട്ടുകളില്‍ ഔദ്യോഗിക സംസം കൗണ്ടറുകള്‍ ഉണ്ടായിരിക്കേ സമയ ലാഭവും മറ്റും നോക്കി പുറമേ നിന്നുള്ളവരില്‍ നിന്നും വാങ്ങുന്ന ഉംറ ഗ്രൂപ്പുകള്‍ ഇത്തരത്തില്‍ വഞ്ചിക്കപ്പെട്ടിരിക്കാന്‍ സാധ്യതകള്‍ ഏറെയാണെന്നും അന്വേഷണ ഉദ്യോഗസ്ഥര്‍ പറഞ്ഞു.