മുംബൈ: നിയമസഭാ തെരഞ്ഞെടുപ്പ് നടക്കാനിരിക്കെ മഹാരാഷ്ട്രയില്‍ കോണ്‍ഗ്രസിനും എന്‍.സി.പിക്കും തിരിച്ചടിയായി നാല് നിയമസഭാംഗങ്ങള്‍ ബി.ജെ.പിയിലേക്ക്.
എന്‍.സി.പി നിയമസഭാംഗങ്ങളായ വൈഭവ് പിച്ചാഡ്, ശിവേന്ദ്ര രാജെ ഭോസ്്‌ലെ, സന്ദീപ് നായിക്ക് എന്നിവര്‍ ഇന്നലെ പാര്‍ട്ടിയില്‍ നിന്ന് രാജിവച്ചു.
കഴിഞ്ഞ ആഴ്ച എന്‍.സി.പിയുടെ മുംബൈ അധ്യക്ഷന്‍ സച്ചിന്‍ ആഹിര്‍ പാര്‍ട്ടിയില്‍ നിന്ന് രാജിവച്ച് ശിവസേനയില്‍ ചേര്‍ന്നിരുന്നു. ഇതിന് പിന്നാലെയാണ് മൂന്നുപേര്‍കൂടി രാജിവച്ചത്. ഇവര്‍ ഇന്ന് ബി.ജെ.പിയില്‍ ചേര്‍ന്നേക്കും.
മൂവരും നിയമസഭാ തെരഞ്ഞെടുപ്പില്‍ ബി.ജെ.പി സ്ഥാനാര്‍ഥികളായി മത്സരിക്കുമെന്നാണ് വിവരം. കോണ്‍ഗ്രസ് എം.എല്‍.എ കാളിദാസ് കൊളാമ്പ്കര്‍ ആണ് രാജിവച്ച മറ്റൊരാള്‍. നേരത്തെ ശിവസേനയിലായിരുന്ന ഇയാള്‍ 2004ലാണ് കോണ്‍ഗ്രസില്‍ ചേര്‍ന്നത്. ഏഴുതവണ നിയമസഭാംഗമായ അദ്ദേഹവും ബി.ജെ.പിയില്‍ ചേരുമെന്ന് അറിയിച്ചിട്ടുണ്ട്.