തിരുവനന്തപുരം: യൂനിവേഴ്‌സിറ്റി കോളജില്‍ വിദ്യാര്‍ഥിയെ കുത്തിക്കൊലപ്പെടുത്താന്‍ ശ്രമിച്ച കേസില്‍ ഒരാള്‍കൂടി കീഴടങ്ങി.
കേസിലെ പതിനാലാം പ്രതിയും കോളജിലെ രണ്ടാംവര്‍ഷ ബിരുദ വിദ്യാര്‍ഥിയുമായ മൂന്നാനക്കുഴി സ്വദേശി സഫ്‌വാന്‍ (20) ആണ് ഇന്നലെ തിരുവനന്തപുരം കന്റോണ്‍മെന്റ് പൊലിസില്‍ കീഴടങ്ങിയത്. കഴിഞ്ഞ ദിവസം സഫ്‌വാനെ കോളജില്‍ നിന്ന് സസ്‌പെന്‍ഡ് ചെയ്തിരുന്നു. ഇതിനുപിന്നാലെയാണ് കീഴടങ്ങിയത്. എന്നാല്‍, ഇയാളെ വീട്ടില്‍നിന്ന് അറസ്റ്റ് ചെയ്തതാണെന്നാണ് പൊലിസ് പറയുന്നത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
ആകെ 30 പേരെ പ്രതിചേര്‍ത്ത കേസില്‍ ഇതുവരെ എട്ടുപേര്‍ പിടിയിലായി. എട്ടുപേര്‍ ഒളിവിലാണ്. 14 പേരെ തിരിച്ചറിയാനുണ്ട്.
അതേസമയം, കേരള സര്‍വകലാശാല ഉത്തരക്കടലാസില്‍ തിരിമറി നടത്തിയതുമായി ബന്ധപ്പെട്ട അന്വേഷണത്തിന് കേസിലെ ഒന്നാംപ്രതി ശിവരഞ്ജിത്തിനെ പൊലിസ് വീണ്ടും കസ്റ്റഡിയില്‍ വാങ്ങും.