ഇരിട്ടി: മധ്യവയസ്‌ക്കനെ ദുരൂഹ സാഹചര്യത്തില്‍ ഇരിട്ടി പാലത്തിനു സമീപം മരിച്ച നിലയില്‍ കണ്ടെത്തിയതില്‍ ദുരൂഹതെയെന്ന് ബന്ധുക്കള്‍ ആരോപിച്ചു.
കുന്നോത്ത് ഞാമത്തോലില്‍ ഹൗസില്‍ ജോയി(58) യെയാണ് ഇന്നലെ രാവിലെ ഇരിട്ടി റോഡരികിലുള്ള ഹാന്‍ടെക്‌സ് കൈത്തറിതുണി വില്‍പ്പന സ്റ്റാളിനടുത്ത് മരിച്ച നിലയില്‍ കണ്ടെത്തിയത്. സമീപത്തെ മില്‍മ ബൂത്തുകാരനാണ് മൃതദേഹം കണ്ടെത്തിയത്.
ചുമട്ടുതൊഴിലാളികള്‍ വിശ്രമിക്കാനായി പഴകിയ ഇലക്ട്രിക് പോസ്റ്റുകളില്‍ നിര്‍മിച്ച താല്‍ക്കാലിക വിശ്രമകേന്ദ്രത്തിലത്താണ് മൃതദേഹം കണ്ടത്. മൂക്കില്‍ നിന്നും വായില്‍ നിന്നും ചോര വാര്‍ന്ന നിലയിലും ശരീരത്തിലും മറ്റും രക്തക്കറ പുരണ്ടിട്ടുമുണ്ടായിരുന്നു
. ചാക്കോ ഉപയോഗിച്ചതെന്നു കരുതുന്ന ചെരിപ്പ് മൃതദേഹത്തില്‍ നിന്നും 15 അടി അകലത്തിലാണുള്ളത്. വിവരമറിഞ്ഞ് സ്ഥലത്തെത്തിയ ചില നാട്ടുകാരാണ് മരിച്ചയാളെ തിരിച്ചറിഞ്ഞത്. സംഭവസ്ഥലത്തെത്തിയ ബന്ധുക്കള്‍ മരണത്തില്‍ ദുരൂഹതയുണ്ടെന്ന് ആരോപിച്ചു. ഇരിട്ടി സി.ഐ രാജീവന്‍ വലിയവളപ്പിലിന്റെ നേതൃത്വത്തിലുള്ള പൊലിസ് സംഘം പ്രാഥമിക പരിശോധന നടത്തി പൂര്‍ത്തിയാക്കി പോസ്റ്റ്‌മോര്‍ട്ടത്തിനായി മൃതദേഹം പരിയാരം മെഡിക്കല്‍ കോളജിലേക്ക് മാറ്റി.