പേരൂര്‍ക്കട: പാതിരിപ്പള്ളിക്കു സമീപം മാഞ്ഞാംപാറയില്‍ മരണാനന്തരച്ചടങ്ങില്‍ പങ്കെടുക്കുകയായിരുന്നവരെ പേപ്പട്ടി ആക്രമിച്ചു.
പത്ര ഏജന്റ് സാംബശിവന്‍, ബന്ധു അനീഷ് കൃഷ്ണ എന്നിവരുള്‍പ്പെടെ പത്തിലധികം പേര്‍ക്കാണ്  കടിയേറ്റത്. ഇതേ പട്ടി മുക്കോലയ്ക്കലിലും മണ്ണന്തലയിലുമായി അഞ്ചുപേരെയും കടിച്ചു. പട്ടിയെക്കണ്ട് ഓടുന്നതിനിടെ തറയില്‍വീണും ചിലര്‍ക്കു പരുക്കേറ്റു. മുക്കോലയ്ക്കല്‍ സ്വദേശികളായ വിക്രമന്‍, ഷിബു എന്നിവരെയും
പാതിരിപ്പള്ളി സ്വദേശികളായ അജയന്‍, രാജന്‍, രഘു എന്നിവര്‍ക്കാണ് മുക്കോലയ്ക്കല്‍ വച്ച് കടിയേറ്റത്. പട്ടിയെ മാഞ്ഞാംപാറയില്‍വച്ച് നാട്ടുകാര്‍ തല്ലിക്കൊന്നു.
കടിയേറ്റവര്‍  ജനറല്‍ ആശുപത്രിയിലും പേരൂര്‍ക്കട ജില്ലാ ആശുപത്രിയിലും ചികിത്സതേടി. തെരുവുനായ ശല്യം ഒഴിവാക്കാന്‍ നഗരസഭ താല്‍പ്പര്യം കാണിക്കുന്നില്ലെന്നാരോപിച്ച് നാട്ടുകാര്‍ പ്രതിഷേധിച്ചു.
അതേ സമയം പേരൂര്‍ക്കട ആശുപത്രിയില്‍ പ്രവേശിപ്പിക്കപ്പെട്ടവര്‍ക്ക് മതിയായ ചികിത്സ ലഭിച്ചില്ലെന്നും
പരാതി ഉയര്‍ന്നു. ഇവര്‍ പിന്നീട് ജനറല്‍ ആശുപത്രിയിലേക്കു പോയി.