കരുനാഗപ്പള്ളി: വിദ്യാഭ്യാസ സംരക്ഷണ യജ്ഞം സൃഷ്ടിച്ച ആവേശത്തിന്റെ അലയൊലിയില്‍ സബ് ജില്ലയിലെ സ്‌കൂളുകള്‍ പുതിയ അദ്ധ്യയന വര്‍ഷത്തിനായി ഒരുങ്ങി. ഓരോ മണ്ഡലത്തിലെയും ഒരു സ്‌കൂളിനെ അന്താരാഷ്ട്ര നിലവാരത്തിലേക്കുയര്‍ത്തുന്നതും മറ്റു വിദ്യാലയങ്ങളെ ഹൈടെക് നിലവാരത്തിലാക്കുന്നതുമെല്ലാം ഇത്തവണ പൊതുവിദ്യാഭ്യാസ മേഖലയ്ക്ക് കൂടുതല്‍ കരുത്ത് പകര്‍ന്നിട്ടുണ്ട്.
കരുനാഗപ്പള്ളി ഉപജില്ലാ തല പ്രവേശനോത്സവം യു.പി.ജി.എസില്‍ നടക്കും. ആര്‍ രാമചന്ദ്രന്‍ എം.എല്‍.എ ഉദ്ഘാടനം ചെയ്യും. മുനിസിപ്പല്‍ തല പ്രവേശനോത്സവം തുറയില്‍കുന്ന് എസ.്എന്‍.യു.പി സ്‌കൂളില്‍ നഗരസഭാ അധ്യക്ഷ എം ശോഭന ഉദ്ഘാടനം ചെയ്യും. ആലപ്പാട് പഞ്ചായത്തുതല ഉദ്ഘാടനം ശ്രായിക്കാട് സ്‌കൂളില്‍ ഗ്രാമപഞ്ചായത്ത് പ്രസിഡന്റ് പി സെലീന നിര്‍വഹിക്കും. കുലശേഖരപുരം പഞ്ചായത്തുതല ഉദ്ഘാടനം വവ്വാക്കാവ് എല്‍.പി.എസില്‍ ആര്‍ രാമചന്ദ്രന്‍ എം.എല്‍.എ നിര്‍വഹിക്കും. പഞ്ചായത്ത് പ്രസിഡന്റ് ശ്രീലേഖാ കൃഷ്ണകുമാര്‍ അധ്യക്ഷയാകും. തൊടിയൂര്‍ പഞ്ചായത്തുതല ഉദ്ഘാടനം മുഴങ്ങോടി എല്‍.വി.യു.പി.എസില്‍ ഗ്രാമ പഞ്ചായത്ത് പ്രസിഡന്റ് കടവിക്കാട്ട് മോഹനന്‍ നിര്‍വഹിക്കും.