ധോല്‍പൂര്‍: നോട്ടുനിരോധനവും ജി.എസ്.ടിയുമാണ് യഥാര്‍ഥത്തില്‍ ഇന്ത്യയുടെ സാമ്പത്തിക സ്ഥിതി തകര്‍ത്തതെന്ന് ആവര്‍ത്തിച്ച് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. രാജസ്ഥാനിലെ ധോല്‍പൂരില്‍ തെരഞ്ഞെടുപ്പു റാലിയില്‍ സംസാരിക്കുകയായിരുന്നു അദ്ദേഹം.
തെരഞ്ഞെടുപ്പു കാലത്ത് പ്രധാനമന്ത്രി നരേന്ദ്രമോദി ആവര്‍ത്തിക്കുന്ന ഒരു വാക്കാണ് താന്‍ കാവല്‍ക്കാരന്‍ (ചൗക്കിധാര്‍) ആണെന്നത്. എന്നാല്‍ അദ്ദേഹം എന്തിന്റെ കാവല്‍ക്കാരനാണെന്ന് വ്യക്തമാക്കാന്‍ അദ്ദേഹം ഇതുവരെ തയാറായിട്ടില്ല.
രാജ്യത്തെ കര്‍ഷകരേയും പാവങ്ങളെയും അവഗണിച്ച് 20ഓളം വ്യവസായികളുടെ താല്‍പര്യങ്ങള്‍ സംരക്ഷിക്കുകയാണ് മോദി ചെയ്യുന്നത്.
യു.പി.എ ഭരണകാലത്ത് കര്‍ഷകരുടെ 70,000 കോടി രൂപയാണ് എഴുതി തള്ളിയത്. എന്നാല്‍ കര്‍ഷകരെ അവഗണിച്ച് വന്‍വ്യവസായികള്‍ ബാങ്കുകളില്‍ നിന്നെടുത്ത വായ്പ തിരിച്ചടക്കാതെ കിട്ടാക്കടമെന്ന പേരില്‍ ഈ സര്‍ക്കാര്‍ എഴുതി തള്ളിയത് 3.5 ലക്ഷം കോടി രൂപയാണ്.
കര്‍ഷകരേയും യുവാക്കളേയും അവഗണിച്ച പ്രധാനമന്ത്രി, നിരവ് മോദി, മെഹുല്‍ ചോക്‌സി, ലളിത് മോദി, അനില്‍ അംബാനി തുടങ്ങിയ വന്‍വ്യവസായികള്‍ക്കായിട്ടാണ് ഭരിക്കുന്നത്.
തന്റെ വ്യവസായ സുഹൃത്തുക്കള്‍ക്കായിട്ടാണ് മോദി പ്രവര്‍ത്തിക്കുന്നത്. റാഫേല്‍ യുദ്ധവിമാന കരാറില്‍ ഇക്കാര്യം വ്യക്തമായിട്ടുണ്ട്. കേന്ദ്ര സര്‍ക്കാരും രാജസ്ഥാന്‍ സര്‍ക്കാരും ജനവിരുദ്ധ നിലപാടുകളാണ് സ്വീകരിക്കുന്നത്. ചെറുകിട വ്യാപാരികള്‍, കര്‍ഷകര്‍, സ്ത്രീകള്‍, യുവാക്കള്‍ എന്നിവരെല്ലാം കേന്ദ്രത്തിന്റെയും രാജസ്ഥാന്‍ സര്‍ക്കാരിന്റേയും വിരുദ്ധ സമീപനത്തില്‍ കഷ്ടപ്പെടുകയാണ്.
കോണ്‍ഗ്രസ് നേതൃത്വത്തിലുള്ള സര്‍ക്കാര്‍ പാവങ്ങള്‍ക്ക് സൗജന്യ ചികിത്സാ സൗകര്യം നടപ്പാക്കിയിരുന്നു. വസുന്ധര സര്‍ക്കാരാകട്ടെ ഇതെല്ലാം തകര്‍ക്കുകയാണ് ചെയ്തതെന്നും രാഹുല്‍ ആരോപിച്ചു.