വിശ്വാസി മനസ്സിനെ സ്ഫുടം ചെയ്‌തെടുക്കുന്ന കാലമാണ് പരിശുദ്ധ റമദാന്‍. ദൈവഭക്തിയിലും ആത്മീയ ചിന്തയിലുമായി വിശ്വാസി തന്റെ മുഴുസമയവും നീക്കിവെക്കുന്നു. പകല്‍ വ്രതം കൊണ്ടും രാവുകള്‍ നമസ്‌കാരങ്ങളെക്കൊണ്ടും ധന്യമാക്കി പരമാവധി നന്മകള്‍ ചെയ്ത് ഇലാഹിനോടടുക്കാന്‍ പരിശുദ്ധ മാസത്തെ ഉപയോഗപ്പെടുത്തുന്ന വിശ്വാസി സമൂഹം ഇലാഹീകോപത്തിന് നിതാനമാകുന്ന പ്രവര്‍ത്തനങ്ങളില്‍ നിന്ന് വിട്ട് നില്‍ക്കുന്നു.
'ഓ വിശ്വാസി സമൂഹമേ, പൂര്‍വ്വിക സമൂഹങ്ങള്‍ക്കെന്ന പോലെ നിങ്ങള്‍ക്കും വ്രതാനുഷ്ഠാനം നിര്‍ബന്ധമാക്കപ്പെട്ടിരിക്കുന്നു, നിങ്ങള്‍ ദൈവഭക്തിയുള്ളവരാവാന്‍ വേണ്ടി' എന്ന വിശുദ്ധ ഖുര്ആനിലെ ആഹ്വാനം വ്രതത്തിന്റെ ആത്യന്തിക ലക്ഷ്യം വ്യക്തമാക്കുന്നു. ദൈവ ഭക്തി യെന്ന ലക്ഷ്യം കൈവരിക്കാത്ത വ്രതങ്ങള്‍ കേവലം പട്ടിണി കിടക്കുക എന്നതിലപ്പുറം യാതൊരു ഫലവും ചെയ്യുന്നില്ല എന്ന്് സുവ്യക്തം. അതിനാല്‍ നമ്മുടെ വ്രതങ്ങള്‍ ദൈവ ഭക്തിക്കും ആത്മീയ വിചാരങ്ങള്‍ക്കും നിതാനമാവുന്നില്ലേ എന്ന് നാം പുനര്‍വിചിന്തനം നടത്തണം.
ഇസ്്‌ലാമിക ഭരണഘടനയായ വിശുദ്ധ ഖുര്‍ആന്‍ അവതീണ്ണമായ മാസം കൂടിയാണ് പരിശുദ്ധ റമദാന്‍. മാലോകര്‍ക്ക് വഴികാട്ടിയും ചിന്തിക്കുന്നവര്‍ക്ക് ദൃഷ്ടാന്തവുമായി അവതരിച്ച വിശുദ്ധ ഗ്രന്ഥ പാരായണത്തില്‍ വിശ്വാസി സമൂഹം ഏറ്റവും കൂടുതല്‍ ശ്രദ്ധപുലര്‍ത്തുന്ന കാലമാണല്ലോ റമദാന്‍. പാരായണത്തോടൊപ്പം ഗഹനമായ വിശുദ്ധ ഗ്രന്ഥത്തിന്റെ ആശയങ്ങള്‍ കൂടി ഉള്‍ക്കൊള്ളാനും ജീവിതത്തില്‍ പകര്‍ത്താനും നമുകക്് സാധിക്കണം. മഹല്ലുകള്‍ കേന്ദ്രമായി സംഘടിപ്പിക്കപ്പെടാറുള്ള മതപഠന ക്ലാസുകള്‍ ഈ ലക്ഷ്യത്തിലേക്ക് വഴിയൊരുക്കട്ടെ.
വ്യക്തി ജീവിതത്തിലും സഹജീവികളോടുള്ള പെരുമാറ്റത്തിലും മാന്യതയും വിശുദ്ധിയും നിലനിര്‍ത്തിപ്പോരുന്നവനാണ് വിശ്വാസി. പരിശുദ്ധമായ റമദാന്‍ മാസത്തില്‍ വിശ്വാസി കളങ്കരഹിതമായ ജീവിതം നയിക്കാന്‍ ബദ്ധശ്രദ്ധ പുലര്‍ത്തുന്നു.
അസഭ്യ വാക്കുകളും അനാവശ്യ സംസാരങ്ങളും ഒഴിവാക്കി നാവിന്റെ പരിശുദ്ധി കാത്തുസൂക്ഷിക്കാന്‍ നോമ്പുകാരന്‍ ശ്രദ്ധിക്കണം. ജനങ്ങളെ തിന്മയില്‍ നിന്ന് പ്രതിരോധിക്കുന്ന കവചമാണ് വ്രതം എന്നാണ് വിശുദ്ധ ഹദീസുകള്‍ സൂചിപ്പിക്കുന്നത്. 'വ്രതം കവചമാണ്. അത് കൊണ്ട് തന്നെ ആരെയും അസഭ്യം പറയുകയോ കയര്‍ത്തു സംസാരിക്കകുകയോ ചെയ്യരുത്. ശണ്ഠ കൂടാന്‍ വരുന്നവരോട് ഞാന്‍ നോമ്പുകാരനാണ് എന്നവന്‍ പറയട്ടെ'(ബുഖാരി, മുസ്ലിം) എന്നാണ് പ്രവാചകന്‍ അനുയായികളെ പഠിപ്പിച്ചത്.
അബലരെയും അശരണരെയും മറ്റു അര്‍ഹരെയും കണ്ടെത്തി ദാനധര്‍മ്മങ്ങളിലൂടെ ദൈവപ്രീതി കരസ്ഥമാക്കാന്‍ നമുക്ക് സാധിക്കണം. സല്‍ക്കര്‍മ്മങ്ങള്‍ക്ക് പതിന്മടങ്ങ് പ്രതിഫലം ലഭിക്കുന്ന ഈ വിശുദ്ധ മാസത്തെ പരമാവധി ഉപയോഗപ്പെടുത്താന്‍ നമുക്ക് സാധിക്കട്ടെ...ആമീന്‍

(ലേഖകന്‍ എസ്.വൈ.എസ് സംസ്ഥാന സെക്രട്ടറിയും തൂശൂര്‍ ജില്ലാ പ്രസിഡന്റുമാണ്)