2.3 മില്യന്‍ മരങ്ങള്‍ നടും

റിയാദ്: സഊദിയില്‍ വ്യാപകമായി മരങ്ങള്‍ നട്ടുപിടിപ്പിക്കാന്‍ നടപടികളുമായി അധികൃതര്‍. ഇതിന്റെ ഭാഗമായി 2.3 മില്യന്‍ വൃക്ഷത്തൈകള്‍ നടാന്‍ പദ്ധതികള്‍ തയാറാക്കി. പരിസ്ഥിതി ജലവകുപ്പ് മന്ത്രാലയത്തിന്റെ നേതൃത്വത്തില്‍ കാര്‍ഷിക സീസണായ ഒക്‌ടോബര്‍ ഒന്നിനാരംഭിച്ച വനവല്‍ക്കരണ പദ്ധതി അടുത്ത ഏപ്രില്‍വരെ നീണ്ടുനില്‍ക്കും.
വിവിധ സര്‍ക്കാര്‍ ഏജന്‍സികളുടെ സഹകരണത്തോടെയാണ് രാജ്യവ്യാപക വനവല്‍ക്കരണം നടപ്പാക്കുന്നത്. ഡിസംബര്‍ 15നകം എട്ടു മേഖലകളിലായി വലിയതോതില്‍ മരങ്ങള്‍ വച്ചുപിടിപ്പിക്കുമെന്നു പരിസ്ഥിതി വകുപ്പ് അണ്ടര്‍ സെക്രട്ടറി ഡോ. ഉസാമ ഫഖീഹ പറഞ്ഞു.
മദീനയില്‍ 50,000, തബൂക്കില്‍ 35,000, റിയാദില്‍ 10,000, ഖസീമില്‍ 20,000, ഉത്തര അതിര്‍ത്തിയില്‍ 15,000, ബിഷയില്‍ 1.4 ലക്ഷം, ജിസാനില്‍ 1.7 ലക്ഷം, അല്‍ അഹ്‌സയില്‍ 1.5 ലക്ഷം എന്നിങ്ങനെയാണ് മരങ്ങള്‍ വച്ചുപിടിപ്പിക്കുക.
കൂടാതെ അടുത്ത വര്‍ഷം മാര്‍ച്ച് ഒന്നിനും ഏപ്രില്‍ പതിനഞ്ചിനുമിടയിലെ ഒന്നര മാസക്കാലയളവില്‍ 6.2 ലക്ഷം മരങ്ങളാണ് റിയാദ് മേഖലയില്‍ നട്ടുപിടിപ്പിക്കുക. അല്‍ ഖര്‍ജ് ഗവര്‍ണറേറ്റില്‍ 90,000 മരങ്ങളും ശഖറ പ്രവിശ്യയില്‍ 80,000 മരങ്ങളും അഫീഫ് ഡിസ്ട്രിക്ടില്‍ രണ്ടു ലക്ഷം മരങ്ങളും സലീല്‍ ഗവര്‍ണറേറ്റില്‍ 2.5 ലക്ഷം മരങ്ങളും നടും. ഖസീം പ്രവിശ്യയില്‍ 2.5 ലക്ഷം മരങ്ങളും മക്ക പ്രവിശ്യയില്‍ 1.2 ലക്ഷം മരങ്ങളും നട്ടുപിടിപ്പിക്കും. കൂടാതെ, മരങ്ങളുടെ വളര്‍ച്ചയ്ക്ക് ഉപകരിക്കുന്ന രീതിയില്‍ ജലസംഭരണികളും ജലസേചനത്തിനുള്ള മറ്റു സംവിധാനങ്ങളും സജ്ജീകരിക്കുന്നുണ്ട്.
മരുഭൂമിയില്‍ വ്യാപകമായി മരങ്ങള്‍ വച്ചുപിടിപ്പിക്കുന്നതിനു വിവിധ ഏജന്‍സികളുമായി കരാറുകളിലും മന്ത്രാലയം ഒപ്പുവച്ചിട്ടുണ്ട്. രാജ്യത്തിന്റെ വിവിധ ഭാഗങ്ങളില്‍ ശക്തമാക്കുന്ന ടൂറിസം വ്യവസായങ്ങള്‍ക്കു കരുത്തേകാനാണ് പുതിയ വനവല്‍ക്കരണംകൊണ്ടു ലക്ഷ്യമിടുന്നത്.