ജക്കാര്‍ത്ത: ഇന്തോനേഷ്യയില്‍ നടക്കുന്ന ഏഷ്യന്‍ പാരാഗെയിംസില്‍ ഇന്ത്യ മെഡല്‍ക്കൊയ്ത്ത് തുടരുന്നു.
മൂന്ന് സ്വര്‍ണം ഉള്‍പ്പെടെ 11 മെഡലുകളാണ് ഇന്ത്യ ഇതുവരെ സ്വന്തമാക്കിയത്. കഴിഞ്ഞ ദിവസം വനിതകളുടെ ക്ലബ് ത്രോയില്‍ ഏക്തഭ്യാനും പുരുഷന്മാരുടെ ജാവലിന്‍ ത്രോയില്‍ സന്ദീപ് ചൗധരിയുമാണ് സ്വര്‍ണം നേടി.ക്ലബ് ത്രോ ഇനത്തില്‍ 16.02 മീറ്റര്‍ദൂരമെറിഞ്ഞായിരുന്നു ഏക്തയുടെ സ്വര്‍ണനേട്ടം. യു.എ.ഇയുടെ അല്‍ക്കാബി തെക്‌റ 15.75 മീറ്റര്‍ ദൂരമെറിഞ്ഞ് വെള്ളി മെഡല്‍ നേടി.
ഈ വര്‍ഷം ഇന്ത്യന്‍ ഓപ്പണ്‍ പാരാ അത്‌ലറ്റിക്‌സ് ചാംപ്യന്‍ഷിപ്പിലും ഏക്ത സ്വര്‍ണം നേടിയിരുന്നു. ഇന്നലെ നടന്ന മത്സരങ്ങളില്‍ ഇന്ത്യ മൂന്ന് വെങ്കലമെഡലുകള്‍കൂടി സ്വന്തമാക്കി. പുരുഷന്മാരുടെ ഷോട്ട്പുട്ടില്‍ മോനു ഗംഗാസ്, പുരുഷന്മാരുടെ 200 മീറ്ററില്‍ അനന്തന്‍ ഗുണശേഖരന്‍, വനിതകളുടെ 200 മീറ്ററില്‍ ജയന്തി ബെഹ്‌റ എന്നിവരാണ് വെങ്കല മെഡല്‍ സ്വന്തമാക്കിയവര്‍. ഇന്ന് ഇന്ത്യക്ക് മെഡല്‍ പ്രതീക്ഷയുള്ള ഇനങ്ങളാണ് കൂടുതലുമുള്ളത്. വനിതകളുടെയും പുരുഷന്‍മാരുടെയും വിവിധ ഇനങ്ങളില്‍ ഷോട്ട്പുട്ട് നടക്കും.