തലശ്ശേരി: തലശ്ശേരി അമൃത കോളജില്‍ നിന്ന് വ്യാജ ബിരുദ സര്‍ട്ടിഫിക്കറ്റുകള്‍ പിടികൂടിയ കേസിന്റെ തുടരന്വേഷണം ക്രൈംബ്രാഞ്ച് ഏറ്റെടുത്തു. 2016 സെപ്റ്റംബര്‍ 29നാണ് പൊലിസ് റെയ്ഡില്‍ ഇവിടെ നിന്ന് ഇന്ത്യയിലെ വിവിധ യൂനിവേഴ്‌സിറ്റികളുടെ പേരിലുള്ള വ്യാജ സര്‍ട്ടിഫിക്കറ്റുകള്‍ പിടിച്ചെടുത്തത്. സ്ഥാപനത്തിന്റെ നടത്തിപ്പുകാരായ പിണറായി പാറപ്രം അമൃതയില്‍ വടക്കയില്‍ അജയന്‍, തിരുവനന്തപുരം വട്ടിയൂര്‍കാവ് സ്വദേശിനി ടിന്റു ബി. ഷാജി എന്നിവരെ അറസ്റ്റ് ചെയ്തിരുന്നു. മാനവ് ഭാരത് സര്‍വകലാശാല, ഛത്തിസ്ഗഢ്, തമിഴ്‌നാട്, വിശ്വഭാരതി, ഗുരുകുല്‍ വിദ്യാപീഠ് തുടങ്ങി 12ഓളം സര്‍വകലാശാലകളുടെ പേരിലാണ് ഇവിടെ നിന്ന് സര്‍ട്ടിഫിക്കറ്റ് നല്‍കിയിരുന്നത്. തലശ്ശേരി സി.ഐ പ്രദീപന്‍ കണ്ണിപ്പൊയിലും സംഘവുമാണ് ഇതുവരെ കേസ് അന്വേഷണം നടത്തിയിരുന്നത്. ഇനി മുതല്‍ ക്രൈംബ്രാഞ്ചിന്റെ പ്രത്യേക സംഘമായിരിക്കും കേസ് അന്വേഷിക്കുക. ലോക്കല്‍ പൊലിസ് അന്വേഷണം മന്ദഗതിയിലായെന്ന് വ്യക്തമായതോടെ അടുത്തിടെ പത്ര പരസ്യം നല്‍കി അമൃത കോളജ് പാര്‍ട്ണര്‍ അജയന്‍ രംഗത്ത് വന്നിരുന്നു. വിദ്യാര്‍ഥികളില്‍ പൊലിസ് ആശയക്കുഴപ്പം സൃഷ്ടിക്കുകയായിരുന്നെന്നും അമൃത കോളജില്‍ നിന്ന് സര്‍ട്ടിഫിക്കറ്റ് ലഭിച്ചവരുടെ സംഗമം സംഘടിപ്പിക്കുമെന്നുമുള്‍പ്പെടെയായിരുന്നു പരസ്യം. കേസ് ക്രൈംബ്രാഞ്ച് ഏറ്റെടുത്തതോടെ ഇതു സംബന്ധിച്ച് കൂടുതല്‍ വിവരങ്ങള്‍ പുറത്ത് വരും.