കോഴിക്കോട്: തിക്കോടി ചിങ്ങപുരം വന്‍മുകം എളമ്പിലാട് എം.എല്‍.പി സ്‌കൂള്‍ വിദ്യാര്‍ഥികള്‍ ലോകതപാല്‍ ദിനത്തില്‍ കലക്ടറേറ്റിലെത്തി ജില്ലാ കലക്ടര്‍ യു.വി ജോസിന് അഭിനന്ദനക്കത്ത് കൈമാറി. കേരളത്തെ പ്രളയം വിഴുങ്ങിയപ്പോള്‍ ദുരിതാശ്വാസ പ്രവര്‍ത്തനങ്ങളിലും പ്രളയാനന്തര ഘട്ടങ്ങളിലും ശ്രദ്ധേയ ഇടപെടലുകള്‍ നടത്തിയ കോഴിക്കോടിന്റെ സ്വന്തം കലക്ടര്‍ക്ക് അഭിനന്ദനങ്ങളറിയിച്ച് തയാറാക്കിയ കത്താണു കൈമാറിയത്. സ്‌കൂള്‍ ലീഡര്‍ ഹൈഫാ ഖദീജയുടെ നേതൃത്വത്തില്‍ കലക്ടറുടെ ചേംബറിലെത്തിയ കൊച്ചുകൂട്ടുകാരെ അഭിനന്ദിച്ച കലക്ടര്‍ അവരോടൊപ്പം അരമണിക്കൂറോളം സംവദിച്ചു. അവരൊരുമിച്ച്് പാടിയ പ്രാര്‍ഥനാ ഗീതം ആസ്വദിക്കുകയും ചെയ്തു.
കത്തുകളുടെ പ്രാധാന്യത്തെക്കുറിച്ചുള്ള ഓര്‍മപ്പെടുത്തല്‍ കൂടിയായാണ് ഇതിനായി ലോകതപാല്‍ദിനം തന്നെ തിരഞ്ഞെടുത്തതെന്ന് അധ്യാപകന്‍ പി.കെ. അബ്ദുറഹ്മാന്‍ പറഞ്ഞു. വി.ടി ഐശ്വര്യ, പി. നൂറുല്‍ ഫിദ, നിഹാല്‍ അഫ്‌സല്‍, ആയിശ മെഹ്ന എന്നിവരുടെ നേതൃത്വത്തിലാണു കുട്ടികളെത്തിയത്.