കുറ്റ്യാടി: അനധികൃത മണല്‍കടത്ത് തടയാനെത്തിയ ഡെപ്യൂട്ടി തഹസില്‍ദാറെയും സംഘത്തെയും ടിപ്പറിടിച്ച് അപായപ്പെടുത്താന്‍ ശ്രമിച്ച സംഭവത്തിലെ ലോറി ഡ്രൈവര്‍ പൊലിസ് പിടിയില്‍. തിരുവള്ളൂര്‍ കന്നിനടയിലെ ചെറിയവളപ്പില്‍ മുസ്തഫയെ (39) ആണ് കുറ്റ്യാടി എസ്.ഐ ഹരീഷിന്റെ നേതൃത്വത്തിലുള്ള സംഘം ഇന്നലെ അറസ്റ്റ് ചെയ്തത്. ചെറുവണ്ണൂര്‍ പഞ്ചായത്തിലെ പെരിഞ്ചേരിക്കടവില്‍നിന്ന് മണല്‍ കടത്തിവരികയായിരുന്ന ടിപ്പര്‍ ലോറിയെ പിന്തുടര്‍ന്നെത്തിയ കൊയിലാണ്ടി താലൂക്ക് ഓഫിസിലെ ഡെപ്യൂട്ടി തഹസില്‍ദാര്‍ പി. ശശിധരനെയും മറ്റു റവന്യു ഉദ്യോഗസ്ഥരെയുമാണു വേളം പള്ളിയത്തുവച്ച് സെപ്റ്റംബര്‍ 30ന് പുലര്‍ച്ചെ ഇവര്‍ സഞ്ചരിച്ച വാഹനത്തില്‍ ഇടിച്ച് അപായപ്പെടുത്താന്‍ ശ്രമിച്ചത്. കൈ കാണിച്ചിട്ടും നിറുത്താതെ കടന്നുകളഞ്ഞതിനെ തുടര്‍ന്നായിരുന്നു ഉദ്യോഗസ്ഥര്‍ ടിപ്പറിനെ പിന്തുടര്‍ന്ന് പിടിക്കാന്‍ ശ്രമിച്ചത്.
സംഭവം നടന്ന ഉടന്‍ഡ ഡ്രൈവറും കൂടെയുള്ളവരും ലോറി ഉപേക്ഷിച്ച് ഓടിരക്ഷപ്പെടുകയായിരുന്നു. കേസില്‍ രണ്ടുപേരെ കൂടി പിടികൂടാനുണ്ടെന്ന് പൊലിസ് പറഞ്ഞു.