തൊടുപുഴ:  ജില്ലാതല സ്‌കൂള്‍ പ്രവേശനോല്‍സവം ഇന്ന് അമരാവതി ഗവ. ഹയര്‍ സെക്കന്‍ഡറി സ്‌കൂളില്‍ നടക്കും.  രാവിലെ 10നു സ്‌കൂള്‍ ഓഡിറ്റോറിയത്തില്‍ നടക്കുന്ന സമ്മേളനം ജോയ്‌സ് ജോര്‍ജ് എം.പി ഉദ്ഘാടനം ചെയ്യും. ഇ.എസ് ബിജിമോള്‍ എം.എല്‍.എ അധ്യക്ഷയാകും. ഇടുക്കി എസ്.എസ്.എ ഡി.പി.ഒ ജോര്‍ജ് ഇഗ്‌നേഷ്യസ് എസ്.എസ്.എ പദ്ധതി വിശദീകരിക്കും. റോഷി അഗസ്റ്റിന്‍ എം.എല്‍.എ പാഠപുസ്തക വിതരണം ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യാ പൗലോസ് യൂനിഫോം വിതരണം ചെയ്യും. ജില്ലാ കലക്ടര്‍ ജി.ആര്‍ ഗോകുല്‍ പ്രഭാഷണം നടത്തും.
പ്രവേശനോത്സവത്തോടെയാണ് കുട്ടികളെ സ്‌കൂളുകളിലേയ്ക്ക് വരവേല്‍ക്കുന്നത്. ആദ്യമായി സ്‌കൂള്‍മുറ്റത്തേക്ക് എത്തുന്ന കുരുന്നുകളെ മുതിര്‍ന്ന കുട്ടികള്‍ സ്‌കൂള്‍ ഗേറ്റ് മുതല്‍ ബൊക്കെയും മറ്റും നല്‍കി വരവേല്‍ക്കും. ജില്ലയിലെ സിബിഎസ്ഇ സ്‌കൂളുകളും പ്രവേശനോത്സവം സംഘടിപ്പിക്കുന്നുണ്ട്.
ആറാമത്തെ അധ്യായനദിവസം പ്രത്യേക സോഫ്റ്റ്‌വെയര്‍ മുഖേന ഓണ്‍ലൈനായി സ്‌കൂളുകളിലെ കുട്ടികളുടെ കണക്കെടുപ്പ് നടത്തും. ഓരോ സ്‌കൂളിലെയും പ്രധാനാധ്യാപകര്‍ അപ്‌ലോഡ് ചെയ്യുന്ന വിവരങ്ങള്‍ എ.ഇ.ഒ, ഡി.ഇ.ഒ മാര്‍ പരിശോധിച്ച ശേഷം ജില്ലാ വിദ്യാഭ്യാസ ഡപ്യൂട്ടി ഡയറക്ടര്‍ക്ക് കൈമാറും. തുടര്‍ന്ന് ക്രോഡീകരിച്ച് പൊതുവിദ്യാഭ്യാസ ഡയറക്‌ട്രേറ്റിന് കൈമാറും.
പുതിയ അധ്യയനവര്‍ഷത്തെ വരവേല്‍ക്കാന്‍ ജില്ലയിലെ സ്‌കൂളുകള്‍ സജ്ജമായി.  കെട്ടിടങ്ങളും ഫര്‍ണിച്ചറും അറ്റകുറ്റപ്പണി നടത്തിയും പെയിന്റിങ് നടത്തി ചുവരുകള്‍ മനോഹരമാക്കിയുമാണ് കുട്ടികളെ സ്വീകരിക്കാന്‍ സജ്ജമാക്കിയത്.