ന്യൂഡല്‍ഹി: ഇന്നു മുതല്‍ 200 യൂനിറ്റ് വരെ വൈദ്യുതി സൗജന്യമായിരിക്കുമെന്ന് ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍ പറഞ്ഞു. 201നും 400നും ഇടയ്ക്ക് വൈദ്യുതി ഉപയോഗിക്കുന്നവര്‍ക്ക് പകുതി തുക മാത്രമാണ് ഈടാക്കുകയെന്നും അദ്ദേഹം കൂട്ടിച്ചേര്‍ത്തു.

ഇന്ന് രാജ്യത്ത് ഏറ്റവും വില കുറഞ്ഞ വൈദ്യുതി നിരക്ക് ഡല്‍ഹിയിലാണുള്ളതെന്നും ഇത് വൈദ്യുതി ശേഖരണത്തെ പ്രോത്സാഹിപ്പിക്കുമെന്നും അദ്ദേഹം പറഞ്ഞു. വി.ഐ.പികള്‍ക്കും രാഷ്ട്രീയ നേതാക്കള്‍ക്കും സൗജന്യമായി വൈദ്യുതി ലഭിച്ചാല്‍ ആരും ഒന്നും മിണ്ടില്ല. എന്നാല്‍ എന്തുകൊണ്ട് ഇത് സാധാരണക്കാര്‍ക്കും ബാധകമായിക്കൂടാ എന്നും അദ്ദേഹം ചോദിച്ചു.

അതേസമയം കേരളത്തില്‍ ഈയിടെയായി വൈദ്യുതി നിരക്കില്‍ 11.4 ശതമാനം വര്‍ധിപ്പിച്ച് സര്‍ക്കാര്‍ ഉത്തരവായിരുന്നു. 100 യൂനിറ്റ് വരെ ഉപയോഗിക്കുന്നവര്‍ക്ക് 42 രൂപയാണ് വര്‍ധിപ്പിച്ചത്. ഇതുപ്രകാരം 84 രൂപയുടെ വര്‍ധനവാണ് 200 യൂനിറ്റ് വൈദ്യുതി ഉപയോഗിക്കുന്നവര്‍ക്ക് കേരള സര്‍ക്കാര്‍ ഈടാക്കിയത്.