ഹരിപ്പാട്: കടലില്‍ അപകടത്തില്‍പ്പെട്ട മത്സ്യബന്ധന വള്ളം മറൈന്‍ എന്‍ഫോഴ്‌സ്‌മെന്റ് രക്ഷപ്പെടുത്തി. ഇന്നലെ ഉച്ചക്ക് രണ്ടു മണിയോടെയാണ് സംഭവം.
ആറാട്ട്പുഴ സ്വദേശി ബാബുവിന്റെ ഉടമസ്ഥതയിലുള്ള ശിവനാമം എന്ന വള്ളമാണ് തൃക്കുന്നപ്പുഴക്ക് പടിഞ്ഞാറ് അപടത്തില്‍പെട്ടത്. വള്ളത്തിന്റെ ക്ലാന്റിന്റെ ഭാഗത്തു കൂടി വെള്ളം കയറിയതാണ് അപകടത്തിനുകാരണം. നാല്‍പതോളം തൊഴിലാളികളാണു വള്ളത്തില്‍ ഉണ്ടായിരുന്നത്. മുങ്ങിത്താണു കൊണ്ടിരുന്ന വള്ളം ആലപ്പുഴ മറൈന്‍ എന്‍ഫോഴ്‌സ്‌മെന്റ് ബോട്ട് ആണു രക്ഷപ്പെടുത്തി കരക്കെത്തിച്ചത്.
ആലപ്പുഴ ഫിഷറീസ് ഡെപ്യൂട്ടി ഡയറക്ടര്‍ എം. സിയാറിന്റെയും, അസിസ്റ്റന്റ് ഡയറക്ടര്‍ ഡോ. നൗഷാദ്ഖാന്റെയും നിര്‍ദേശപ്രകാരം എ.എസ്.ഐ യേശുദാസ്, എസ് സി പി ഒ ജിഷ്ണു വേണുഗോപാല്‍, സി പി ഒമാരായ ജോസഫ് ജോണ്‍, സതീഷ് ലൈഫ് ഗാര്‍ഡ് ജോര്‍ജ് എന്നിവരാണ് പ്രതികൂല കാലാവസ്ഥയെ തരണം ചെയ്തു കടലില്‍ പോയി തൊഴിലാളികളെ സുരക്ഷിതമായി കരയില്‍ എത്തിച്ചത്.