കോഴിക്കോട്: എയര്‍പോര്‍ട്ട് ആന്‍ഡ് എയര്‍ലൈന്‍സ് മാനേജ്‌മെന്റ് കോഴ്‌സിന്റെ പേരില്‍ മാവൂര്‍ റോഡില്‍ പ്രവര്‍ത്തിക്കുന്ന സ്ഥാപനം തട്ടിപ്പു നടത്തിയെന്നാരോപിച്ച് വിദ്യാര്‍ഥികള്‍ നിരാഹാര സമരത്തിലേക്ക്. ഭാരതിയാര്‍ സര്‍വകലാശാലയുടെ മൂന്നുവര്‍ഷ കാലയളവുള്ള കോഴ്‌സാണെന്ന് തെറ്റിദ്ധരിപ്പിച്ച് നാലു ലക്ഷം രൂപവരെ ഫീസ് വാങ്ങിയാണ് തങ്ങളെ സ്ഥാപനത്തില്‍ ചേര്‍ത്തതെന്ന് വിദ്യാര്‍ഥികള്‍ വാര്‍ത്താസമ്മേളനത്തില്‍ പറഞ്ഞു.
കോഴ്‌സ് കഴിഞ്ഞെങ്കിലും ഇതുവരെ സര്‍ട്ടിഫിക്കറ്റ് നല്‍കാന്‍ സ്ഥാപനം തയാറായിട്ടില്ല. ഇതു സംബന്ധിച്ച് പൊലിസില്‍ പരാതി നല്‍കുകയും നടക്കാവ് എസ്.ഐ അന്വേഷിക്കുകയും ചെയ്തിരുന്നു. പിന്നീട് എസ്.ഐയെ മാറ്റി ഡിവൈ.എസ്.പിക്ക് ചുമതല നല്‍കിയെങ്കിലും ബന്ധപ്പെട്ട ഉദ്യോഗസ്ഥന്‍ ഇതുവരെ തങ്ങളുടെ മൊഴി രേഖപ്പെടുത്തുക പോലും ചെയ്തിട്ടില്ലെന്ന് വിദ്യാര്‍ഥികള്‍ കുറ്റപ്പെടുത്തി. ഇന്നുമുതല്‍ മരണം വരെ സ്ഥാപനത്തിന് മുന്നില്‍ നിരാഹാര സമരം നടത്താനാണ് വിദ്യാര്‍ഥികളുടെ തീരുമാനം. സര്‍ട്ടിഫിക്കറ്റ് നല്‍കുന്നതിനുള്ള നടപടികള്‍ സ്വീകരിക്കണമെന്നാവശ്യപ്പെട്ട് മുഖ്യമന്ത്രിക്ക് നിവേദനം നല്‍കിയതായും വിദ്യാര്‍ഥികള്‍ പറഞ്ഞു. വാര്‍ത്താസമ്മേളനത്തില്‍ ഹര്‍ഷാദ്, കീര്‍ത്തിമ, രേഷ്മ, ആതിര, ഷിറ്റിഷ പങ്കെടുത്തു.