മഞ്ചേരി: മഞ്ചേരിയിലെ പ്രധാന റോഡുകളിലെ സീബ്രാ ലൈനുകളില്‍ വാഹനങ്ങള്‍ നിര്‍ത്തിയിടുന്നത് കാല്‍നടയാത്രക്കാര്‍ക്ക് ദുരിതമാകുന്നു. അനധികൃതമായി വാഹനങ്ങള്‍ നിര്‍ത്തിയിടുന്നത് പതിവായതോടെ മഞ്ചേരിയിലെ പ്രധാന റോഡുകളിലെല്ലാം സീബ്രാലൈനുകള്‍ വെറുതെയാവുകയാണ്. മലപ്പുറം റോഡില്‍ വരച്ചിട്ടുള്ള സീബ്രാലൈനിനു മുകളിലാണ് പലപ്പോഴും ചരക്ക് ലോറികള്‍ ഉള്‍പെടെയുള്ള വാഹനങ്ങള്‍ നിര്‍ത്തിയിടുന്നത്.
വാഹനങ്ങള്‍ അനധികൃതമായി ഇത്തരത്തില്‍ കയറ്റി നിര്‍ത്തിടുന്നത് മൂലം റോഡ് മുറിച്ചു കടക്കാന്‍ നില്‍ക്കുന്നവര്‍ വലിയ പ്രയാസമാണ് നേരിടേണ്ടി വരുന്നത്. കഴിഞ്ഞ ദിവസം കെ.എസ്.ആര്‍.ടി.സി ബസ് മലപ്പുറം റോഡിലെ സീബ്രാ ലൈനില്‍ നിര്‍ത്തിയതുമായി ബന്ധപ്പെട്ട് വാക്കേറ്റം ഉണ്ടായിരുന്നു. മലപ്പുറം റോഡില്‍ പഴയ സ്റ്റാന്‍ഡിന് പരിസരത്തെ സീബ്രാ ലൈനില്‍ അധിക സമയവും ചരക്കുലോറികള്‍ നിര്‍ത്തിയിടുന്നുണ്ട്. സ്‌കൂള്‍ വിദ്യാര്‍ഥികള്‍ ഉള്‍പ്പടെ നിരവധി പേരാണ് ഇവിടെ റോഡ് മുറിച്ചു കടക്കാന്‍ കഷ്ടപ്പെടുന്നത്. നഗരത്തിന്റെ വിവിധ റോഡുകളില്‍ വരച്ചിട്ടുള്ള സീബ്രാ ലൈനുകളുടെയും സ്ഥിതി വിഭിന്നമല്ല. പൊലിസിന്റെ കര്‍ശന പരിശോധന മാത്രമാണ് സീബ്രാ ലൈനുകളിലൂടെയുള്ള കാല്‍നട യാത്രക്കാരുടെ സഞ്ചാരം സുരക്ഷിതമാക്കുകയുള്ളു.