കൊണ്ടോട്ടി: ജില്ലയില്‍ വിദ്യാലയങ്ങളും പ്രൊഫഷനല്‍ കോളജുകളും കേന്ദ്രീകരിച്ച് മയക്കു ഗുളികകള്‍ മൊത്ത വിതരണം ചെയ്യുന്ന യുവാവ് അറസ്റ്റിലായി. വണ്ടൂര്‍ നടുവത്ത് അഭിലാഷ്(30)ആണ് കൊണ്ടോട്ടിയില്‍ പിടിയിലായത്.
മലപ്പുറം നര്‍ക്കോട്ടിക്ക് സെല്‍ ഡിവൈ.എസ്.പി സലീമിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ രണ്ട് ദിവസം മുന്‍പ് മഞ്ചേരി ആനക്കയം സ്വദേശി അബ്ദുല്‍കബീര്‍ എന്നയാളെ കോട്ടക്കലില്‍നിന്നു പ്രത്യേക അന്വേഷണ സംഘം പിടികൂടിയിരുന്നു. ഇയാളെ ചോദ്യം ചെയ്തതില്‍നിന്നാണ് ഇയാള്‍ക്ക് ഗുളികകള്‍ എത്തിച്ചുനല്‍കുന്ന വണ്ടൂര്‍ സ്വദേശിയെക്കുറിച്ച് സൂചന ലഭിച്ചത്.
ഇന്നലെ മയക്കുഗുളികകളുടെ വിപണനത്തിനായി കൊണ്ടോട്ടിയിലേക്ക് വരുന്നുണ്ടെന്ന രഹസ്യവിവരം കിട്ടിയതിന്റെ അടിസ്ഥാനത്തില്‍ പൊലിസ് നടത്തിയനീക്കത്തില്‍ മയക്കുഗുളികകളുമായി കൊണ്ടോട്ടി സ്വകാര്യ ആശുപത്രിക്ക് പരിസരത്തുനിന്നുമാണ് ഇയാളെ പിടികൂടിയത്. ഇയാളുടെ കൈയില്‍നിന്നു മയക്കുമരുന്ന് ഇനത്തില്‍ പെട്ട നൂറില്‍പരം ഗുളികകളാണ് കണ്ടെടുത്തു. പ്രതിക്കെതിരേ ജില്ലക്കകത്തും പുറത്തുമായി പോക്കറ്റടി, മയക്കുമരുന്ന് തുടങ്ങി 15-ല്‍പരം കേസുകള്‍ നിലവിലുണ്ടെന്ന് പൊലിസ് പറഞ്ഞു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
ഡിവൈ.എസ്.പി ജലീല്‍ തോട്ടത്തില്‍ കൊണ്ടോട്ടി സി.ഐ മുഹമ്മദ് ഹനീഫ, എസ്.ഐ വിനോദ് എന്നിവരുടെ നേതൃത്വത്തില്‍ പ്രത്യേക അന്വേഷണ സംഘാംഗങ്ങളായ ശശികുണ്ടറക്കാട്, സത്യനാഥന്‍ മനാട്ട്, അബ്ദുല്‍അസീസ് പി.സഞ്ജീവ്, ഉണ്ണികൃഷ്ണന്‍ മാരാത്ത്, എ.എസ്.ഐ സന്തോഷ്, അനീഷ് എന്നിവരാണ് പ്രതിയെ പിടികൂടി അന്വേഷണം നടത്തുന്നത്.