ആലപ്പുഴ: തുടര്‍ച്ചയായ പരിശോധനകളിലൂടെ അനര്‍ഹരെ കണ്ടെത്തി റേഷന്‍ കാര്‍ഡിന്റെ മുന്‍ഗണനാ പട്ടികയില്‍ നിന്നും ഒഴിവാക്കണമെന്ന് സംസ്ഥാന മനുഷ്യാവകാശ കമ്മിഷന്‍. അര്‍ഹരായവര്‍ക്ക് എത്രയുംവേഗം മുന്‍ഗണനാ റേഷന്‍കാര്‍ഡുകള്‍ നല്‍കണമെന്നും കമ്മിഷന്‍ ജുഡീഷ്യല്‍ അംഗം പി. മോഹനദാസ് ഭക്ഷ്യ, പൊതുഭരണവകുപ്പ് സെക്രട്ടറിക്ക് നിര്‍ദേശം നല്‍കി.
റേഷന്‍ കാര്‍ഡിലെ അംഗങ്ങളുടെ എണ്ണത്തിന് അനുസരിച്ച് റേഷന്‍ വിഹിതം ലഭ്യമാക്കാന്‍ ഭക്ഷ്യസുരക്ഷാ നിയമപ്രകാരം നടപടികള്‍ സ്വീകരിക്കണമെന്നും കമ്മിഷന്‍ ആവശ്യപ്പെട്ടു. മനുഷ്യാവകാശ പ്രവര്‍ത്തകനായ എം.ജയമോഹന്‍ നല്‍കിയ പരാതിയിലാണ് നടപടി. പരാതിയില്‍ കമ്മിഷന്‍ ഭക്ഷ്യ സെക്രട്ടറിയില്‍ നിന്നും റിപ്പോര്‍ട്ട് വാങ്ങിയിരുന്നു. അനര്‍ഹരെ കണ്ടെത്തി മുന്‍ഗണനാ വിഭാഗത്തില്‍ ഉള്‍പ്പെടുത്താന്‍ നടപടി സ്വീകരിക്കുന്നുണ്ടെന്ന് ഭക്ഷ്യ സെക്രട്ടറി കമ്മിഷനെ അറിയിച്ചു.
റേഷന്‍ വിഹിതം വര്‍ധിപ്പിക്കാന്‍ കേന്ദ്രസര്‍ക്കാരിനോട് ആവശ്യപ്പെട്ടെങ്കിലും അനുകൂല നടപടിയുണ്ടായില്ലെന്നും റിപ്പോര്‍ട്ടില്‍ പറയുന്നു. എന്നാല്‍ അര്‍ഹരായ ബി.പി.എല്‍ കാര്‍ഡ് ഉടമകള്‍ക്ക് മുന്‍ഗണനാ പട്ടികയില്‍ ഇടംനേടാന്‍ കഴിഞ്ഞിട്ടില്ലെന്ന് കമ്മിഷന്‍ ചൂണ്ടിക്കാട്ടി. ഇതിനാവശ്യമായ നടപടികള്‍ സ്വീകരിക്കുന്നുണ്ടെങ്കിലും പൂര്‍ണമായും പ്രാവര്‍ത്തികമല്ലെന്നും കമ്മിഷന്‍ നിരീക്ഷിച്ചു.