മക്ക: ഹജ്ജ് അനുമതി പത്രമില്ലാതെ അനധികൃത ഹജ്ജ് ചെയ്യുന്നവരെ പിടികൂടാന്‍ ഡിജിറ്റല്‍ സംവിധാനവുമായി അധികൃതര്‍. തീര്‍ഥാടകരുടെ പേരുവിവരങ്ങള്‍ അറിയുന്നതിനും അവരുടെ നിയമ സാധുത ഉറപ്പുവരുത്തുന്നതിനും ബന്ധപ്പെട്ട ഉദ്യോഗസ്ഥരുടെ പക്കല്‍ ഇലക്‌ട്രോണിക് ഉപകരണങ്ങളുണ്ടാകുമെന്നും ഹജ്ജ് അധികൃതര്‍ അറിയിച്ചു. ഹജ്ജ് തീര്‍ഥാടനം തിരക്കിലേക്ക് നീങ്ങുന്ന സാഹചര്യത്തിലാണ് അധികൃതര്‍ കൃത്രിമ നടപടികള്‍ക്കെതിരേ കടുത്ത നിലപാടുമായി രംഗത്തുവന്നിരിക്കുന്നത്.

തിരക്ക് വര്‍ധിച്ചതോടെ വിശുദ്ധ ഹറമില്‍ ഒരേസമയം പത്തു ലക്ഷത്തിലേറെ പേരെ ഉള്‍ക്കൊള്ളുന്നതിന് സൗകര്യം ഒരുക്കിയതായി സുരക്ഷാ സേനാ ഡെപ്യൂട്ടി കമാന്‍ഡറും ഹറം സുരക്ഷാ സേനാ കമാന്‍ഡറുമായ മേജര്‍ ജനറല്‍ മുഹമ്മദ് അല്‍അഹ്മദി പറഞ്ഞു. മതാഫിന്റെ അഞ്ചു നിലകളിലും കൂടി മണിക്കൂറില്‍ 1,05,000 പേര്‍ക്ക് ത്വവാഫ് കര്‍മം നിര്‍വഹിക്കുന്നതിന് സാധിക്കും. വിശുദ്ധ കഅ്ബാലയത്തോട് ചേര്‍ന്ന പ്രധാന മതാഫില്‍ മണിക്കൂറില്‍ 30,000 പേര്‍ക്കും മതാഫ് കോംപ്ലക്‌സിലെ അടിയിലെ നിലയില്‍ മണിക്കൂറില്‍ 10,500 പേര്‍ക്കും രണ്ടാം നിലയില്‍ 28,500 പേര്‍ക്കും ടെറസില്‍ 36,500 പേര്‍ക്കും വീല്‍ചെയറുകള്‍ക്കും ഇലക്ട്രിക് വീല്‍ചെയറുകള്‍ക്കുമുള്ള നിലയില്‍ രണ്ടായിരം പേര്‍ക്കും ത്വവാഫ് കര്‍മം നിര്‍വഹിക്കുന്നതിന് സാധിക്കും.

മതാഫിലേതിന് സമാനമായ ശേഷിയാണ് മസ്അക്കുമുള്ളതെന്ന് മേജര്‍ ജനറല്‍ മുഹമ്മദ് അല്‍അഹ്മദി പറഞ്ഞു. ഷട്ടില്‍ സര്‍വീസിന് അറഫ പാലം ഈ വര്‍ഷം പുതുതായി പ്രയോജനപ്പെടുത്തുമെന്ന് ട്രാഫിക് കാര്യങ്ങള്‍ക്കുള്ള ഹജ്ജ് സുരക്ഷാ സേനാ അസിസ്റ്റന്റ് കമാണ്ടര്‍ മേജര്‍ ജനറല്‍ മുഹമ്മദ് അല്‍ബസ്സാമി പറഞ്ഞു. ബസ് ഷട്ടില്‍ സര്‍വിസുകള്‍ വഴി എട്ടു ലക്ഷം ഹാജിമാര്‍ക്ക് ഈ വര്‍ഷം യാത്രാ സൗകര്യം ലഭിക്കുമെന്നും സഊദി ട്രാഫിക് ഡയറക്ടറേറ്റ് മേധാവി കൂടിയായ മേജര്‍ ജനറല്‍ മുഹമ്മദ് അല്‍ബസ്സാമി പറഞ്ഞു.