നീലേശ്വരം: തൈക്കടപ്പുറത്തു നിന്നു കഞ്ചാവു പിടികൂടി. മൂന്നു പേരെ പൊലിസ് കസ്റ്റഡിയിലെടുത്തു. തൈക്കടപ്പുറത്തെ എ.എന്‍ അസ്‌കര്‍ (28), നീലേശ്വരത്തെ അക്ഷയ് അശോക് (21), കരുവളത്തെ ജോഷി (21) എന്നിവരെയാണ് നീലേശ്വരം എസ്.ഐ പി.നാരായണന്റെ നേതൃത്വത്തിലുള്ള സംഘം പിടികൂടിയത്. കൂട്ടത്തിലുണ്ടായിരുന്ന ശരത് ഓടി രക്ഷപ്പെട്ടു. ഇവരില്‍ നിന്നു ഒരു കിലോ ഗ്രാം കഞ്ചാവും പിടിച്ചെടുത്തു.
കഞ്ചാവ് വില്‍പന നടത്തുന്നതായി നാട്ടുകാര്‍ വിവരമറിയിച്ചതിനെ തുടര്‍ന്നാണു പൊലിസ് എത്തി ഇവരെ പിടികൂടിയത്. ഇന്നലെ വൈകുന്നേരം ആറു മണിയോടെയാണു സംഭവം. അതേസമയം, ഇതിനിടയില്‍ പ്രദേശത്തെ രണ്ടു ബൈക്കുകളും തകര്‍ക്കപ്പെട്ടിട്ടുണ്ട്. സംഘര്‍ഷ സാധ്യത കണക്കിലെടുത്തു സ്ഥലത്ത് പൊലിസ് ബന്തവസും ഏര്‍പ്പെടുത്തിയിട്ടുണ്ട്.