തിരുവനന്തപുരം: പൊതുജനാരോഗ്യത്തേയും മെഡിക്കല്‍ വിദ്യാഭ്യാസത്തേയും സാരമായി ബാധിക്കുന്ന നാഷണല്‍ മെഡിക്കല്‍ കമ്മിഷന്‍ ബില്ലിനെതിരേ മെഡിക്കല്‍ വിദ്യാര്‍ഥികളും ഡോക്ടര്‍മാരും രാജ്ഭവനു മുന്നില്‍ പ്രതിഷേധിച്ചു. മെഡിക്കല്‍ സ്റ്റുഡന്റ്‌സ് നെറ്റ്‌വര്‍ക്കിന്റെ നേതൃത്വത്തില്‍ ബില്ലിനെതിരേ വിദ്യാര്‍ഥികള്‍ നിരാഹാര സമരം നടത്തി.
ബുധനാഴ്ച രാത്രി മുതല്‍ അഞ്ചുവിദ്യാര്‍ഥികളാണ് അനിശ്ചിതകാല നിരാഹാര സമരം തുടങ്ങിയത്. അജിത് പോള്‍, അര്‍ജുന്‍ വി.സി, രാകേഷ്, നവീന്‍, ലിഷ എന്നീ വിദ്യാര്‍ഥികളാണ് നിരാഹാരമിരിക്കുന്നത്. മെഡിക്കല്‍ വിദ്യാര്‍ഥികള്‍ക്ക് പിന്തുണ പ്രഖ്യാപിച്ച് ഇന്നലെ മുതിര്‍ന്ന ഡോക്ടര്‍മാരും നിരാഹാരം അനുഷ്ഠിച്ചു. ഡോ.സ്വപ്ന (ഐ.എം.എ ), ഡോ. ബിനോയി (കെ.ജി എം.സി.റ്റി.എ), ഡോ. അര്‍ഷാദ് (ഗവ. സ്പഷലിസ്റ്റ് ഡോക്ടേസ് അസോസിയേഷന്‍) എന്നിവരാണ് ഏകദിന നിരാഹാരം അനുഷ്ഠിച്ചത്. ബില്‍ പിന്‍വലിക്കാന്‍ തയാറായില്ലെങ്കില്‍ ജൂനിയര്‍ ഡോക്ടര്‍മാരുടെ സമരത്തിന് പിന്തുണ പ്രഖ്യാപിച്ച് തിങ്കളാഴ്ച്ച മുതല്‍ ഡ്യൂട്ടി ബഹിഷ്‌കരിച്ച് സമരം ചെയ്യുമെന്ന് മുതിര്‍ന്ന ഡോക്ടര്‍മാര്‍ അറിയിച്ചു.
അതേസമയം രാജ്ഭവനിലേയ്ക്ക് മെഡിക്കല്‍ വിദ്യാര്‍ഥികള്‍ നടത്തിയ മാര്‍ച്ചില്‍ നേരിയ സംഘര്‍ഷമുണ്ടായി. ഇന്നലെ രാവിലെ 11 ഓടെ രാജ്ഭവന് മുന്നില്‍ പ്രതിഷേധിച്ച വിദ്യാര്‍ഥികള്‍ മെഡിക്കല്‍ കമ്മിഷന്‍ ബില്ല് പ്രതീകാത്മകമായി കത്തിച്ചു. തുടര്‍ന്ന് റോഡ് ഉപരോധിക്കാനുള്ള വിദ്യാര്‍ത്ഥികളുടെ ശ്രമം പൊലിസ് തടഞ്ഞു. ഇതില്‍ പ്രതിഷേധിച്ച് വിദ്യാര്‍ഥികളൊന്നടങ്കം പ്രകടനമായെത്തി രാജ്ഭവനിലേക്ക് തള്ളിക്കയറാന്‍ ശ്രമിച്ചു. ബാരിക്കേട് വച്ച് ഇതും പൊലിസ് തടഞ്ഞു.
ഇതോടെ പൊലിസും പ്രതിഷേധക്കാരും തമ്മില്‍ വക്കേറ്റമുണ്ടായി. അനുമതി വാങ്ങാതെ പ്രതിഷേധിച്ചതിനാല്‍ രാജ്ഭവന് മുന്നില്‍ സമരം തുടരാന്‍ അനുവദിക്കില്ലെന്ന് പൊലിസ് അറിയിച്ചെങ്കിലും മുദ്രാവാക്യം വിളികളോടെ വിദ്യാര്‍ഥികള്‍ പ്രതിഷേധം തുടര്‍ന്നു. പ്രതിഷേധം തുടര്‍ന്നാല്‍ അനന്തരനടപടികളിലേക്ക് നീങ്ങുമെന്ന നിലപാടില്‍ പൊലിസ് ഉറച്ചുനിന്നതോടെ ഐ.എം.എ ഭാരവാഹികള്‍ ഇടപെട്ടു. തുടര്‍ന്ന് ഒരുവിഭാഗം വിദ്യാര്‍ഥികളെ ഐ.എം.എ ഹെഡ്ക്വാട്ടേഴ്‌സിലേയ്ക്ക് മാറ്റി. ഇതോടെ അരമണിക്കൂര്‍ നീണ്ടുനിന്ന സംഘര്‍ഷത്തിന് അയവുവന്നു. നിരാഹാരമിരുന്ന അഞ്ചു വിദ്യാര്‍ഥികള്‍ സമരം തുടരുകയും ചെയ്തു.