ന്യൂഡല്‍ഹി: നിയമ സഭാ തെരഞ്ഞെടുപ്പ് മുന്നില്‍കണ്ട് വന്‍പ്രഖ്യാപനവുമായി ഡല്‍ഹി സര്‍ക്കാര്‍. 200 യൂനിറ്റിന് താഴെ വൈദ്യുതി ഉപയോഗിക്കുന്നവര്‍ക്കുള്ള വൈദ്യുതി ചാര്‍ജ് പൂര്‍ണമായും ഒഴിവാക്കുന്ന ചരിത്രപരമായ പ്രഖ്യാപനമാണ് ഇന്നലെ മുഖ്യമന്ത്രി അരവിന്ദ് കെജ്‌രിവാള്‍ നടത്തിയത്.
201 നും 400 നും ഇടയില്‍ യൂനിറ്റ് വൈദ്യുതി ഉപയോഗിക്കുന്നവര്‍ ബില്ലില്‍ രേഖപ്പെടുത്തുന്ന തുകയുടെ പകുതി നല്‍കിയാല്‍ മതിയെന്നും മുഖ്യമന്ത്രി പ്രഖ്യാപിച്ചു.
അനധികൃത കോളനികള്‍ ക്രമവല്‍ക്കരിക്കാനുള്ള പ്രഖ്യാപനത്തിന് പിന്നാലെയാണ് വൈദ്യുതി ബില്ലിലും വന്‍പ്രഖ്യാപനവുമായി ഡല്‍ഹി സര്‍ക്കാര്‍ വന്നത്. പുതിയ പ്രഖ്യാപനത്തെ തുടര്‍ന്ന് 1,800 കോടി മുതല്‍ 2,000 കോടി രൂപവരെ പ്രതിവര്‍ഷം ഡല്‍ഹി സര്‍ക്കാര്‍ വൈദ്യുതിക്ക് സബ്‌സിഡി നല്‍കേണ്ടി വരും.
രാജ്യത്ത് വൈദ്യുതി നിരക്ക് ഏറ്റവും കുറവ് ഡല്‍ഹിയിലാണെന്ന് മുഖ്യമന്ത്രി അരവിന്ദ് കെജ്‌രിവാള്‍ പറഞ്ഞു.
വി.ഐ.പികള്‍ക്കും രാഷ്ട്രീയ നേതാക്കള്‍ക്കും വൈദ്യുതി ഇളവ് നല്‍കുന്നുണ്ടെങ്കില്‍ എന്തുകൊണ്ട് അത് സാധാരണക്കാര്‍ക്കും ആയിക്കൂടായെന്ന് മുഖ്യമന്ത്രി ചോദിച്ചു.
പ്രമുഖര്‍ക്ക് ലഭിക്കുന്ന തരത്തില്‍ സാധാരണക്കാര്‍ക്കും 24 മണിക്കൂറും വൈദ്യുതി ഇളവ് ലഭിക്കണമെന്നതുകൊണ്ടാണ് ഇത്തരമൊരു നീക്കം നടത്തിയതെന്നും അദ്ദേഹം വ്യക്തമാക്കി.