ലണ്ടന്‍: ഇന്ന് ആരംഭിക്കുന്ന ഐ.സി.സി ചാംപ്യന്‍സ് ട്രോഫി ക്രിക്കറ്റ് പോരാട്ടം ആഘോഷമാക്കി ഗൂഗഌം. മനോഹരമായ ഡൂഡിലൊരുക്കിയാണ് ഗൂഗ്ള്‍ ക്രിക്കറ്റുത്സവത്തെ വരവേല്‍ക്കുന്നത്. നമുക്കും ക്രിക്കറ്റ് കളിക്കാവുന്ന രൂപത്തിലുള്ള ഡൂഡിലാണ് ഇത്തവണ ഗൂഗ്ള്‍ ഒരുക്കിയിരിക്കുന്നത്. ഒരു ചീവീടാണ് ബാറ്റ്‌സ്മാന്‍. ഫീല്‍ഡര്‍മാരെല്ലാം ഒച്ചുകളും.

ഏകദിന റാങ്കിങിലെ ആദ്യ എട്ട് ടീമുകള്‍ മാറ്റുരയ്ക്കുന്ന ടൂര്‍ണമെന്റ് ഇന്ന് മുതല്‍ ഈ മാസം 18 വരെ ഇംഗ്ലണ്ടിലാണ് അരങ്ങേറുന്നത്. നിലവിലെ ചാംപ്യന്‍മാരായ ഇന്ത്യ, ആസ്‌ത്രേലിയ, ന്യൂസിലന്‍ഡ്, ദക്ഷിണാഫ്രിക്ക, പാകിസ്താന്‍, ശ്രീലങ്ക, ആതിഥേയരായ ഇംഗ്ലണ്ട്, ബംഗ്ലാദേശ് ടീമുകളാണ് നേര്‍ക്കുനേര്‍ വരുന്നത്. ടീമുകളെ നാല് വീതമുള്ള രണ്ട് ഗ്രൂപ്പുകളാക്കിയാണ് മത്സരങ്ങള്‍.

ലോകകപ്പിന്റെ ചെറു പതിപ്പെന്ന നിലയില്‍ ശ്രദ്ധേയമായ ടൂര്‍ണമെന്റിലെ മത്സരങ്ങള്‍ ഇന്ത്യന്‍ സമയം വൈകിട്ട് മൂന്ന് മുതലാണ് ആരംഭിക്കുന്നത്. ഇന്ന് ആദ്യ മത്സരത്തില്‍ ആതിഥേയരായ ഇംഗ്ലണ്ട് ബംഗ്ലാദേശുമായി ഏറ്റുമുട്ടും. ഇന്ത്യയുടെ ആദ്യ മത്സരം ഈ മാസം നാലിന് ചിരവൈരികളായ പാകിസ്താനുമായാണ്.