ന്യൂഡല്‍ഹി: നാലു രാജ്യങ്ങളിലായി ആറു ദിവസത്തെ യാത്ര നടത്തുന്ന ഇന്ത്യന്‍ പ്രധാന മന്ത്രി നരേന്ദ്രമോദി റഷ്യയിലെത്തി. റഷ്യന്‍ സഹകരണത്തോടെ ഇന്ത്യയില്‍ നിര്‍മിച്ച കൂടംകുളം ആണവ നിലയത്തിന്റെ അവസാന രണ്ടു യൂണിറ്റുകളുടെ നിര്‍മാണവുമായി ബന്ധപ്പെട്ട കരാറില്‍ ഒപ്പുവെക്കുമെന്നാണ് കരുതുന്നത്.

സെന്റ് പീറ്റേഴ്‌സ് ബര്‍ഗ് വാര്‍ഷിക സമ്മേളനത്തില്‍ അദ്ദേഹം പങ്കെടുക്കും. ആദ്യമായാണ് ഒരു ഇന്ത്യന്‍ പ്രധാനമന്ത്രി റഷ്യന്‍ സാമ്പത്തിക ഉച്ചകോടിയില്‍ പങ്കെടുക്കുന്നത്. ഉച്ചകോടിയില്‍ റഷ്യന്‍ പ്രസിഡന്റ് വ്‌ളാദിമിര്‍ പുടിനുമായി വിവിധ കരാറുകളും ഒപ്പുവെക്കും. ശാസ്ത്ര സാങ്കേതിക മേഖല, റെയില്‍വേ, വ്യവസായം തുടങ്ങിയമേഖലകള്‍ കരാറില്‍ ഉള്‍ക്കൊള്ളും.

സന്ദര്‍ശനം ഫലപ്രദമാക്കുന്നതിന് ശ്രമിക്കുമെന്നാണ് റഷ്യയിലെത്തിയ മോദി ട്വീറ്റ് ചെയ്തത്.