തിരുവനന്തപുരം: സംസ്ഥാന സ്‌കൂള്‍ കലോത്സവം കാസര്‍കോട്ടും കായികമേള കണ്ണൂരിലും നടത്താന്‍ ഇന്നലെ ചേര്‍ന്ന ക്യു.ഐ.പി മോണിറ്ററിങ് കമ്മിറ്റി യോഗം തീരുമാനിച്ചു.
നവംബര്‍ അവസാനമോ ഡിസംബര്‍ ആദ്യവാരമോ ആകും കലോത്സവം നടത്തുക. കായികമേള നവംബര്‍ രണ്ടാംവാരവും ശാസ്ത്രമേള ആദ്യ ആഴ്ചയും നടക്കും.
സ്‌പെഷല്‍ സ്‌കൂള്‍ കലോത്സവം ഒക്ടോബര്‍ 20 മുതല്‍ 22 വരെ പാലക്കാട്ട് നടക്കും. അധ്യാപക ദിനത്തോടനുബന്ധിച്ച് സെപ്റ്റംബര്‍ നാല്, അഞ്ച് തിയതികളില്‍ തിരുവനന്തപുരത്ത് വിപുലമായ ആഘോഷങ്ങള്‍ നടത്തും. ഇതോടനുബന്ധിച്ച് ടി.ടി.ഐ കലോത്സവവും നടത്താനാണ് തീരുമാനം.
ഡി.ജി.ഇ ജീവന്‍ ബാബുവിന്റെ അധ്യക്ഷതയില്‍ ചേര്‍ന്ന യോഗത്തില്‍ വിദ്യാഭ്യാസ സെക്രട്ടറി എ. ഷാജഹാന്‍, വിവിധ അധ്യാപക സംഘടനാ ഭാരവാഹികളായ കെ.സി ഹരികൃഷ്ണന്‍, സി.കെ അജിത്കുമാര്‍, എന്‍. ശ്രീകുമാര്‍, എ.കെ സൈനുദ്ദീന്‍ പങ്കെടുത്തു.