ഫ്‌ളോറിഡ: ലോകകപ്പിലെ തോല്‍വിക്ക് ശേഷവും അതിന് ശേഷം നടക്കുന്ന വിവാദങ്ങള്‍ക്കിടയിലും ഇന്ത്യന്‍ ക്രിക്കറ്റ് ടീം ഇന്ന് മുതല്‍ വീണ്ടും മത്സര ചൂടിലേക്ക്. വെസ്റ്റ് ഇന്‍ഡീസുമായുള്ള ടി20 പരമ്പരക്ക് വേണ്ടിയാണ് ലോകകപ്പിന് ശേഷം ഇന്ത്യ ആദ്യമായി ഇറങ്ങുന്നത്.
അമേരിക്കയിലെ ഫ്‌ളോറിഡയില്‍ ആദ്യ ര@ണ്ട് ടി20 മത്സരം കളിച്ചശേഷം ടീമുകള്‍ വെസ്റ്റ് ഇന്‍ഡീസില്‍വച്ച് പരമ്പരയിലെ ബാക്കി മത്സരം കളിക്കും. മൂന്ന് വീതം ടി20, ഏകദിന മത്സരങ്ങളും ര@ണ്ട് ടെസ്റ്റുകളും ഉള്‍പ്പെടുന്നതാണ് പരമ്പര. വിന്‍ഡീസും ഇന്ത്യയും തമ്മിലുള്ള ടെസ്റ്റ് ലോക ടെസ്റ്റ് ചാംപ്യന്‍ഷിപ്പില്‍ ഉള്‍പ്പെട്ടതാണ്. ടി20 ലോകകപ്പിന് ഇന്ത്യന്‍ ടീമിനെ ഒരുക്കുക എന്നതാണ് വെസ്റ്റ് ഇന്‍ഡീസ് പരമ്പരയുടെ പ്രധാന ലക്ഷ്യം.
വിന്‍ഡീസ് പരമ്പരക്ക് ശേഷം ടി20 ലോകകപ്പിനുള്ള മികച്ച ടീമിനെ പ്രഖ്യാപിക്കും. ഇതിനായി കൂടുതല്‍ യുവതാരങ്ങളേയും ടീമില്‍ ഉള്‍പ്പെടുത്തിയിട്ടുണ്ട്. ലോകകപ്പിലെ മുറിവുണക്കാന്‍ ഇന്ത്യക്ക് പരമ്പര വിജയം അനിവാര്യമാണ്.
അതിനാല്‍ മികച്ച കളി കാഴ്ചവയ്ക്കാനൊരുങ്ങുകയാണ് ടീം ഇന്ത്യ. കീറോണ്‍ പൊള്ളാര്‍ഡ്, സുനില്‍ നരേന്‍, ഷിമ്രോണ്‍ ഹെറ്റ്‌മെയര്‍, കാര്‍ലോസ് ബ്രാത്ത്‌വെയ്റ്റ്, ആന്ദ്രെ റസ്സല്‍ തുടങ്ങിയ പ്രമുഖരാണ് വിന്‍ഡീസ് നിരയില്‍ ഇന്ത്യക്കെതിരേ ഇറങ്ങുന്നത്. ലോകകപ്പില്‍ പ്രതീക്ഷിച്ച പ്രകടനം നടത്താന്‍ കഴിയാതിരുന്ന വെസ്റ്റ് ഇന്‍ഡീസും ഇന്ത്യക്കെതിരായ പരമ്പര വിജയം തന്നെയാണ് ലക്ഷ്യമിടുന്നത്.
വിരാട് കോഹ്‌ലി, രോഹിത് ശര്‍മ, ശിഖര്‍ ധവാന്‍, കെ.എല്‍ രാഹുല്‍, ശ്രേയസ് അയ്യര്‍, മനീഷ് പാണ്ഡെ, ഋഷഭ് പന്ത്, ക്രുനാല്‍ പാണ്ഡ്യ, രവീന്ദ്ര ജഡേജ, വാഷിങ്ടണ്‍ സുന്ദര്‍, ഭുവനേശ്വര്‍ കുമാര്‍, ഖലീല്‍ അഹമ്മദ്, ദീപക് ചഹാര്‍, നവദീപ് സെയ്‌നി തുടങ്ങിയ താരങ്ങളാണ് ഇന്ത്യക്ക് വേണ്ടി മത്സരത്തിനിറങ്ങുന്നത്. രാഹുല്‍ ചഹാറും നവദീപ് സെയ്‌നിയും ഇന്ത്യക്കായി അരങ്ങേറ്റം കുറിക്കുമെന്നാണ് പ്രതീക്ഷ. ഇന്ത്യന്‍ ക്യാപ്റ്റന്‍ വിരാട് കോഹ്‌ലിയും വൈസ് ക്യാപ്റ്റന്‍ രോഹിത് ശര്‍മയും തമ്മിലുള്ള വിവാദവും പരിശീലകനെ മാറ്റുന്നത് സംബന്ധിച്ച ആലോചനയും നടക്കുന്നതിനിടെ ഇന്ത്യക്ക് പരമ്പര നിര്‍ണായകമായിരിക്കും. രാത്രി എട്ടിനാണ് ആദ്യ ടി20 നടക്കുന്നത്.