ത്തനംതിട്ട: മകളുടെ കാമുകനും കൂട്ടാളികളും ചേര്‍ന്ന് ആക്രമിച്ച പിതാവ് മരിച്ച സംഭവത്തില്‍ പ്രതികളെ കണ്ടെത്താന്‍ കഴിയാതെ പൊലിസ്. പ്രണയത്തെ എതിര്‍ത്തതിനെ തുടര്‍ന്ന് കാമുകന്‍ സംഘം ചേര്‍ന്ന് ആക്രമിച്ച് ഗുരുതരമായി പരുക്കേല്‍പ്പിച്ച കാമുകിയുടെ പിതാവാണ് വൈക്കത്തെ സ്വകാര്യ ആശുപത്രിയില്‍ കഴിഞ്ഞ ദിവസം വെളുപ്പിന് മരിച്ചത്.
ഇലന്തൂര്‍ ഇടപ്പരിയാരം വിജയവിലാസത്തില്‍ സജീവ് (49) ആണ് മരിച്ചത്. വള്ളിക്കോട് കോട്ടയം സ്വദേശിയായ സ്വകാര്യ ബസ് ഡ്രൈവറായ യുവാവുമായി സജീവിന്റെ മകള്‍ കഴിഞ്ഞ മൂന്നു വര്‍ഷമായി പ്രണയത്തിലായിരുന്നു. ഗള്‍ഫില്‍ ജോലിയിലായിരുന്ന സജീവ് ഈ വിവരമറിഞ്ഞാണ് നാട്ടിലെത്തിയത്. ഭാര്യയും മകളുമായി ഈ വിഷയത്തില്‍ കലഹിക്കുകയും തുടര്‍ന്ന് കാമുകനായിരുന്ന യുവാവെത്തി പിതാവിനെ മര്‍ദിക്കുകയുമായിരുന്നു. ഇത് സംബന്ധിച്ചു ആറന്മുള പൊലിസില്‍ പരാതിയും നല്‍കിയിരുന്നു.
അതിനിടെ മകള്‍ വീട്ടിലിരുന്ന സ്വര്‍ണവുമായി കാമുകനൊപ്പം പോയി. ഇവര്‍ കഴിഞ്ഞ ദിവസം മെഴുവേലി കുറിയാനിപ്പള്ളിയിലുള്ള സജീവിന്റെ ഭാര്യ വീട്ടില്‍ എത്തിയതറിഞ്ഞാണ് സജീവ് അവിടെ ചെന്നത്. അവിടെവച്ച് മകളുടെ കാമുകനും സംഘവും സജീവിനെ ക്രൂരമായി മര്‍ദിക്കുകയായിരുന്നു. ഇലവുംതിട്ട പൊലിസ് കേസെടുത്ത് അന്വേഷണം നടക്കുന്നതിനിടയിലാണ് സജീവിന്റെ മരണം. പൊലിസിന് ബന്ധുക്കള്‍ നല്‍കിയ മൊഴിയില്‍ മകളുടെ കാമുകനും മറ്റ് നാലഞ്ചുപേരും ചേര്‍ന്നാണ് മര്‍ദിച്ചതെന്ന് പറഞ്ഞിട്ടുണ്ട്. എന്നാല്‍ രാഷ്ട്രീയ സ്വാധീനം മൂലമാണ് പ്രതികളെ പിടികൂടാന്‍ വൈകുന്നതെന്നാരോപിച്ച് മുഖ്യമന്ത്രിക്ക് നിവേദനം നല്‍കുവാനൊരുങ്ങുകയാണ് ബന്ധുക്കള്‍.