ഈരാറ്റുപേട്ട: സ്‌റ്റേജില്‍ നിറഞ്ഞ് നില്‍ക്കുന്ന തോണി, തോണിയില്‍ ഒന്നാം ക്ലാസില്‍ പ്രവേശനം ലഭിച്ച 62 വിദ്യാര്‍ഥികളും ഒപ്പം കേരളത്തിന്റെ നാടന്‍ വിഭവങ്ങളായ ചക്കയും മാങ്ങയും കപ്പയും വാഴപ്പഴവും, മരങ്ങള്‍ പ്രകൃതിയുടെ സമ്പത്ത് എന്ന സന്ദേശമുയര്‍ത്തി തോണിയുടെ മുന്നില്‍ മരം, മാതൃഭാഷയായ മലയാളത്തെ സ്‌നേഹിക്കണമെന്ന ആഹ്വാനവുമായി മലയാള അക്ഷരങ്ങളുയര്‍ത്തി കുരുന്നുകള്‍ തുടങ്ങിയ പുതുമകള്‍ കൊï് വേറിട്ടതായിരുന്നു ചെമ്മലമറ്റം ലിറ്റില്‍ ഫ്‌ളവര്‍ സ്‌കൂളിലെ പ്രവേശനോത്സവം. ഈ വര്‍ഷം സര്‍ക്കാര്‍ നടപ്പിലാക്കുന്ന പദ്ധതികള്‍ വിദ്യാര്‍ഥികള്‍ പ്രതീകാത്മകമായി അവതരിപ്പിച്ചു. തിടനാട് ഗ്രാമപഞ്ചായത്ത് പ്രസിഡന്റ് മിനി സാവിയോ ഉദ്ഘാടനം ചെയ്തു.
 സ്‌കൂള്‍ മാനേജര്‍ ഫാ. സെബാസ്റ്റ്യന്‍ പാട്ടത്തില്‍ അധ്യക്ഷനായി. ഹെഡ്മാസ്റ്റര്‍ പോള്‍ തോമസ്, സുജ ബാബു, സെബാസ്റ്റിയന്‍ വിളയാനി, ജോയിച്ചന്‍ തുരുത്തിയില്‍ ഫാ. ജേക്കബ് പേഴത്തുങ്കല്‍ തുടങ്ങിയവര്‍ സംസാരിച്ചു.