ജക്കാര്‍ത്ത: ഇന്തോനേഷ്യയിലെ ബൊര്‍നിയോ ദ്വീപിനോടു ചേര്‍ന്ന് മത്സ്യബന്ധനബോട്ട് മുങ്ങി നാലു പേര്‍ മരിച്ചു. 30ലേറെ പേരെ കാണാതായതായും റിപ്പോര്‍ട്ടുണ്ട്.
ബോട്ടില്‍ 37 പേരുണ്ടായിരുന്നതായും രണ്ടു പേരേ രക്ഷപ്പെട്ടിട്ടുള്ളൂവെന്നും രക്ഷാപ്രവര്‍ത്തനം നടത്തുന്ന ഏജന്‍സി വക്താവ് ഇമാന്‍ സപുത്ര പറഞ്ഞു. നാലു പേരുടെ മൃതദേഹങ്ങള്‍ കിട്ടിയതായും തിരച്ചില്‍ നാലു ദിവസം കൂടി തുടരുമെന്നും അവര്‍ അറിയിച്ചു. ശക്തമായ കാറ്റാണ് തിരച്ചിലിനു തടസമാകുന്നത്. ജാവ ദ്വീപില്‍നിന്ന് മൂന്നു ദിവസം മുമ്പ് യാത്രപോയ ബോട്ട് അപകടത്തില്‍ പെട്ടതായി ഇന്നലെ നാലു മൃതദേഹങ്ങള്‍ മറ്റൊരു ബോട്ടിനു ലഭിച്ചതോടെയാണ് അറിയുന്നത്. വേണ്ടത്ര സുരക്ഷാ സന്നാഹങ്ങളില്ലാതെയാണ് ബോട്ടുകള്‍ മത്സ്യബന്ധനത്തിനു പോകുന്നത്.