റിയാദ്: തെക്കന്‍ യമനിലെ സൈനിക കേന്ദ്രത്തില്‍ അല്‍ഖാഇദ തീവ്രവാദികള്‍ നടത്തിയ വെടിവയ്പ്പില്‍ 19 സൈനികര്‍ കൊല്ലപ്പെട്ടു. നിരവധി പേര്‍ക്ക് പരുക്കേല്‍ക്കുകയും ചെയ്തു. തോക്കുമായെത്തിയ തീവ്രവാദികള്‍ തുരുതുരാ വെടിയുതിര്‍ക്കുകയായിരുന്നു. അബ്യാന്‍ പ്രവിശ്യയിലെ അല്‍ മഹ്ഫദ് സൈനിക ക്യാംപിന് നേരെയാണ് ആക്രമണം നടന്നത്. ക്യാംപില്‍ കടന്ന തീവ്രവാദികളെ നീണ്ട ഏറ്റുമുട്ടലിനൊടുവിലാണ് കൊലപ്പെടുത്തിയത്.
വ്യാഴാഴ്ച സൈനിക ക്യാംപില്‍ ഹൂതി വിമതര്‍ നടത്തിയ രണ്ട് ആക്രമണങ്ങളില്‍ 47 സൈനികര്‍ കൊല്ലപ്പെട്ടിരുന്നു. മിസൈല്‍ ആക്രമണത്തില്‍ 36 പേരും ചാവേര്‍ ബോംബ് പൊട്ടിത്തെറിച്ച് 11 പേരുമാണ് കൊല്ലപ്പെട്ടിരുന്നത്. ഏദനില്‍ വ്യാഴാഴ്ച നടന്ന ആക്രമണം മുതലെടുത്താണ് അല്‍ഖാഇദ തീവ്രവാദികള്‍ അല്‍ മഹ്ഫദ് സൈനിക ക്യാംപില്‍ സൈനികരുമായി ഏറ്റുമുട്ടിയതെന്നു സര്‍ക്കാര്‍ സുരക്ഷാ ഉദ്യോഗസ്ഥര്‍ പറഞ്ഞു. തുടര്‍ന്ന് സഊദി നേതൃത്വത്തിലുള്ള അറബ് സഖ്യസേനയുടെ സഹായവും സൈന്യം തേടിയിരുന്നു.