ലണ്ടന്‍: ചാംപ്യന്‍സ് ട്രോഫി ക്രിക്കറ്റിലെ ആദ്യ മത്സരത്തില്‍ ആതിഥേയരായ ഇംഗ്ലണ്ടിന് വിജയത്തുടക്കം. ബംഗ്ലാദേശിനെ എട്ട് വിക്കറ്റിനാണ് ഇംഗ്ലണ്ട് കീഴടക്കിയത്.
ആദ്യം ബാറ്റ് ചെയ്ത ബംഗ്ലാദേശ് നിശ്ചിത 50 ഓവറില്‍ ആറ് വിക്കറ്റ് നഷ്ടത്തില്‍ 305 റണ്‍സെടുത്തപ്പോള്‍ ഇംഗ്ലണ്ട് 47.2 ഓവറില്‍ രണ്ട് വിക്കറ്റ് മാത്രം നഷ്ടത്തില്‍ 308 റണ്‍സെടുത്ത് വിജയം സ്വന്തമാക്കുകയായിരുന്നു.
സെഞ്ച്വറി നേടി പുറത്താകാതെ നിന്ന ജോ റൂട്ട് (133), അലക്‌സ് ഹെയ്ല്‍ (95), നായകന്‍ ഇയാന്‍ മോര്‍ഗന്‍ (പുറത്താകാതെ 75) എന്നിവരുടെ ബാറ്റിങാണ് ഇംഗ്ലീഷ് ജയം അനായാസമാക്കിയത്. റൂട്ട് 129 പന്തുകള്‍ നേരിട്ട് 11 ഫോറും ഒരു സിക്‌സും പറത്തിയപ്പോള്‍ മോര്‍ഗന്‍ 61 പന്തില്‍ എട്ട് ഫോറും രണ്ട് സിക്‌സുമാണ് നേടിയത്. 86 പന്തില്‍ 95 റണ്‍സ് കണ്ടെത്തിയ ഹെയ്ല്‍സിന് നിര്‍ഭാഗ്യം കൊണ്ടാണ് സെഞ്ച്വറി നഷ്ടമായത്.
നേരത്തെ ടോസ് നേടി ഇംഗ്ലണ്ട് ബൗളിങ് തിരഞ്ഞെടുക്കുകയായിരുന്നു. ഓപണര്‍ തമിം ഇഖ്ബാല്‍ നേടിയ സെഞ്ച്വറിയുടെ കരുത്തിലാണ് ബംഗ്ലാദേശ് മികച്ച സ്‌കോര്‍ പടുത്തുയര്‍ത്തിയത്. 142 പന്തുകള്‍ നേരിട്ട് 12 ഫോറും മൂന്ന് സിക്‌സും പറത്തി തമിം 128 റണ്‍സ് കണ്ടെത്തി.
മധ്യനിരയില്‍ മുഷ്ഫിഖുര്‍ റഹിം 79 റണ്‍സെടുത്ത് തമീമിന് മികച്ച പിന്തുണ നല്‍കി. കൂറ്റന്‍ സ്‌കോറിലേക്ക് കുതിക്കുകയായിരുന്ന ബംഗ്ലാദേശിന് നാല് വിക്കറ്റുകള്‍ വീഴ്ത്തിയ പ്ലങ്കറ്റാണ് പിടിച്ചു നിര്‍ത്തിയത്.