തിരുവനന്തപുരം: കേന്ദ്ര മന്ത്രിയും ഗവര്‍ണറുമായിരുന്ന എം.എം ജേക്കബിന്റെ സ്മരണാര്‍ഥം ഫൗണ്ടേഷന്‍ ഏര്‍പ്പെടുത്തിയ പുരസ്‌കാരം രമ്യാ ഹരിദാസ് എം.പിക്ക്. യുവജന വനിതാ ശാക്തീകരണത്തിനാണ് രമ്യക്ക് അവാര്‍ഡ് നല്‍കുന്നതെന്ന് ഫൗണ്ടേഷന്‍ ചെയര്‍പേഴ്‌സന്‍ ജയാ ചന്ദ്രഹാസന്‍ വാര്‍ത്താസമ്മേളനത്തില്‍ അറിയിച്ചു. ഗ്രാമവികസന പ്രവര്‍ത്തനത്തിനുള്ള അവാര്‍ഡ് കുടുംബശ്രീക്കാണ്.
50,001 രൂപയും ബി.ഡി ദത്തന്‍ വരച്ച ചിത്രം ഉള്‍ക്കൊള്ളുന്ന ഫലകവുമാണ് പുരസ്‌കാരം. ഈമാസം 11ന് വൈകിട്ട് 3.30ന് രാമപുരം പ്ലാസാ കണ്‍വന്‍ഷന്‍ സെന്ററില്‍ നടക്കുന്ന സമ്മേളനത്തില്‍ പ്രതിപക്ഷ നേതാവ് രമേശ് ചെന്നിത്തലയും മുന്‍ മുഖ്യമന്ത്രി ഉമ്മന്‍ ചാണ്ടിയും അവാര്‍ഡുകള്‍ വിതരണം ചെയ്യും. ഫൗണ്ടേഷന്‍ ജോയിന്റ് സെക്രട്ടറി സി.ടി രാജന്‍, അംഗം സതീഷ് അമ്പാടി എന്നിവരും വാര്‍ത്താസമ്മേളനത്തില്‍ പങ്കെടുത്തു.