ന്യൂഡല്‍ഹി: മലയാളി സമൂഹത്തിന്റെ വിദ്യാഭ്യാസ സാമൂഹിക ശാക്തീകരണ സംരംഭങ്ങള്‍ക്ക് ദേശീയ തലത്തില്‍ ഇടംപിടിക്കാന്‍ നൂതന പദ്ധതികളുടെ പ്രഖ്യാപനങ്ങള്‍ക്ക് കാതോര്‍ക്കുന്ന എസ്.കെ.എസ്.എസ്.എഫ് നാഷനല്‍ ഡെലിഗേറ്റ്‌സ് കോണ്‍ഫറന്‍സിനുള്ള ഒരുക്കങ്ങള്‍ ആരംഭിച്ചു.
ഓഗസ്റ്റ് 30, 31 തിയതികളില്‍ രാജ്യത്തിന്റെ വിവിധ ഭാഗങ്ങളില്‍നിന്നെത്തുന്ന പ്രതിനിധികളെ സ്വീകരിക്കാനും സമ്മേളന പരിപാടികള്‍ വന്‍ വിജയമാക്കാനും വിപുലമായ സംഘാടക സമിതി രൂപീകരിച്ചു. വിവിധ സംസ്ഥാനങ്ങളില്‍നിന്ന് മുന്‍കൂട്ടി രജിസ്റ്റര്‍ ചെയ്ത പ്രതിനിധികളാണ് കോണ്‍ഫറന്‍സില്‍ സംബന്ധിക്കുക.
ഇന്‍ക്ലൂസിവ് ഇന്ത്യ എന്ന സന്ദേശമുയര്‍ത്തിപ്പിടിച്ച് സംഘടിപ്പിക്കുന്ന രണ്ട് ദിവസത്തെ കോണ്‍ഫറന്‍സില്‍ സമസ്ത കേരള ജംഇയ്യത്തുല്‍ ഉലമയുടെ നേതാക്കള്‍ക്ക് പുറമെ വിദ്യാഭ്യാസ, സാംസ്‌കാരിക മേഖലകളിലെ പ്രമുഖരും ജനപ്രതിനിധികളും സംബന്ധിക്കും. സംഘാടക സമിതി യോഗത്തില്‍ അഡ്വ. സി.കെ ഫൈസല്‍ അധ്യക്ഷനായി.
ആഷിഖ് വാഫി, നൗഷാദ് ഹുദവി, ജലീല്‍ ഫൈസി, ഇജാസ്, നൗഫല്‍ വാഫി, മുഹമ്മദ് അലി, ശാക്കിര്‍ ഹുദവി, ദാവൂദ് വാഫി, ശുഐബ് ഹംസ, ശംസീര്‍ കേളോത്ത്, മുന്‍ഷിദ് എളേറ്റില്‍ സംബന്ധിച്ചു. സമ്മേളനത്തിന്റെ നടത്തിപ്പിനായി വിവിധ ഉപസമിതികള്‍ പ്രവര്‍ത്തനമാരംഭിച്ചു.