തിരുവനന്തപുരം: തലസ്ഥാനത്ത് മാധ്യമപ്രവര്‍ത്തകന്‍ കെ.എം ബഷീറിനെ ഇടിച്ച് കൊലപ്പെടുത്തിയ കാര്‍ മുന്‍പും അമിതവേഗതക്ക് കേസില്‍പ്പെട്ടിട്ടുണ്ടെന്ന് റിപ്പോര്‍ട്ട്. 

അപകടസമയത്ത് കൂടെയുണ്ടായിരുന്ന മോഡലും ദുബൈ വ്യവസായിയുമായ വഫ ഫിറോസിന്റെ കാറാണ് അമിതവേഗതക്ക് മുന്‍പും കേസില്‍പ്പെട്ടിട്ടുള്ളത്. 

മുന്‍പ് മൂന്നുപ്രാവശ്യമാണ് അമിതവേഗതയില്‍ ഓടിച്ചതിന് മോട്ടോര്‍ വാഹന വകുപ്പിന്റെ കാമറയില്‍ ഈ കാര്‍ പതിഞ്ഞിട്ടുള്ളത്. മൂന്നുതവണ കാമറയില്‍ കുടുങ്ങിയതായി മോട്ടോര്‍ വാഹനവകുപ്പിന്റെ ചെക് റിപ്പോര്‍ട്ട് വ്യക്തമാക്കുന്നു. 

അതേസമയം, സംഭവത്തില്‍ വാഹനമോടിച്ചയാളുടെ ലൈസന്‍സ് റദ്ദാക്കുമെന്ന് മന്ത്രി എ.കെ ശശീന്ദ്രന്‍ പറഞ്ഞു. പൊലിസിന്റെ ഭാഗത്തുനിന്ന് വീഴ്ച സംഭവിച്ചുവെന്ന ആരോപണം പ്രത്യേകം അന്വേഷിക്കണമെന്ന് ഡി.ജി.പിയോട് പറഞ്ഞിട്ടുണ്ട്. എല്ലാ നടപടികളും സ്വീകരിക്കാന്‍ ട്രാന്‍സ്‌പോര്‍ട്ട് സെക്രട്ടറിക്കും നിര്‍ദേശം നല്‍കിയിട്ടുണ്ടെന്നും മന്ത്രി പറഞ്ഞു.ഉപരിപഠനത്തിനുശേഷം രണ്ടാഴ്ചമുന്‍പ് വിദേശത്ത് നിന്ന് മടങ്ങിയെത്തിയ ശ്രീരാം വെങ്കിട്ടരാമന്‍ കഴിഞ്ഞ ദിവസം തിരുവനന്തപുരത്തെ ഒരു ക്ലബില്‍ ഉല്ലസിച്ച് മടങ്ങുമ്പോഴാണ് അപകടമുണ്ടായത്.