ബദിയഡുക്ക: കഞ്ചാവ് കടത്ത് ഒറ്റികൊടുത്തുവെന്നാരോപിച്ച് യുവാവിനെ തട്ടിക്കൊണ്ടുപോയി മര്‍ദിച്ചതായി പരാതി. മര്‍ദിച്ച് അവശനാക്കുകയും തുടര്‍ന്ന് മൊബൈല്‍ ഫോണും വാച്ചും കവര്‍ന്നതിനുശേഷം വിജനമായ സ്ഥലത്ത് തള്ളിയിട്ട് നാലംഗ സംഘം രക്ഷപ്പെട്ടുവെന്നുമാണു പരാതി.
നെല്ലിക്കട്ട ചെന്നടുക്കയിലെ അബ്ദുള്‍ നൗഷാദ് എന്ന കാട്ടി നൗഷാദ് (29)നാണ് മര്‍ദനമേറ്റത്. ഗുരുതരമായി പരുക്കേറ്റ നൗഷാദിനെ മംഗളൂരു ദേര്‍ളക്കട്ടയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
കഴിഞ്ഞ ദിവസം വൈകുന്നേരം നെല്ലിക്കട്ടയില്‍ കാറിലെത്തിയ നാലംഗ സംഘം നൗഷാദിനെ ബലമായി കാറില്‍ പിടിച്ചുകയറ്റി കാര്‍ ഓടിച്ചു പോകുന്നതിനിടയില്‍ കഞ്ചാവ് കടത്തിനെ ഒറ്റികൊടുത്തുവെന്നും അഞ്ചു ലക്ഷം രൂപ നഷ്ടപ്പെട്ടുവെന്നും ആ പണം തരണമെന്നും ആവശ്യപ്പെട്ട് മര്‍ദിക്കുകയും മധൂര്‍ പറക്കിലയിലെ വിജനമായ സ്ഥലത്തെ കുറ്റിക്കാട്ടില്‍ തള്ളിയിട്ട് രക്ഷപ്പെട്ടുവെന്നുമാണ് നൗഷാദ് പറയുന്നത്. പിന്നിട് അവിടെ നിന്നു മധൂരിലെത്തി മറ്റൊരാളുടെ സഹായത്തോടെ ബന്ധുക്കളെ വിവരം അറിയിച്ചതിനെ തുടര്‍ന്ന് അവര്‍ എത്തിയാണ് ആശുപത്രിയില്‍ കൊണ്ടു പോയതെന്നും നൗഷാദ് ബദിയഡുക്ക പൊലിസില്‍ നല്‍കിയ പരാതിയില്‍ പറയുന്നു. നൗഷാദിന്റെ പരാതി പ്രകാരം നെല്ലിക്കട്ടയിലെ ബദറുദ്ദീന്‍, സഫ്‌വാന്‍, ഓബ്‌റ സമദ് എന്ന സമദാനി, കൂടാതെ കണ്ടലറിയാവുന്ന ഒരാള്‍ക്കുമെതിരേ ബദിയഡുക്ക പൊലിസ് കേസെടുത്ത് അന്വേഷണം ആരംഭിച്ചു.