വാഷിങ്ടണ്‍: തലച്ചോറുമായി ബന്ധമുള്ള നൂറിലേറെ ജീനുകള്‍ കണ്ടെത്തി. അള്‍ഷിമേഴ്‌സ്, അപസ്മാര ചികിത്സയില്‍ വഴിത്തിരിവാകുമെന്നു പ്രതീക്ഷിക്കപ്പെടുന്ന കണ്ടെത്തലാണ് ശാസ്ത്രസംഘം പുറത്തുവിട്ടിരിക്കുന്നത്.
അമേരിക്കയിലെ ടെക്‌സാസിലുള്ള പീറ്റര്‍ ഒ ഡോണല്‍ ജൂനിയര്‍ ബ്രെയിന്‍ ഇന്‍സ്റ്റിറ്റ്യൂട്ടിലെ ഗവേഷകരാണ് പുതിയ പഠനത്തിനു പിന്നില്‍. തലച്ചോറിലെ വ്യത്യസ്ത പ്രവര്‍ത്തനങ്ങള്‍ക്കു പിന്നിലുള്ള ജീനുകള്‍ കണ്ടെത്താനായി നടത്തിയ പഠനത്തിലാണ് നൂറിലേറെ വരുന്ന ജീനുകള്‍ തിരിച്ചറിഞ്ഞത്. മനുഷ്യന്റെ ഓര്‍മശേഷിയെ മനസിലാക്കാനുള്ള പുതിയ വാതായനങ്ങളാണ് പഠനം തുറന്നിട്ടിരിക്കുന്നതെന്ന് ഗവേഷണത്തിനു നേതൃത്വം നല്‍കിയ ഗെനെവീവ് കോണോപ്ക പറഞ്ഞു. ഇപ്പോള്‍ കണ്ടെത്തിയ ജീനുകളെല്ലാം മനുഷ്യന്റെ തലച്ചോറുമായി ബന്ധമുള്ളവയാണെന്ന് അവര്‍ പറഞ്ഞു.
ഒ ഡോണല്‍ ബ്രെയിന്‍ ഇന്‍സ്റ്റിറ്റ്യൂട്ടിലെ ന്യൂറോ സര്‍ജനായ ബ്രാഡ്‌ലി ലെഗയുമായി ചേര്‍ന്നാണ് ഗെനെവീവ് കോണോപ്ക പഠനം നടത്തിയത്. അപസ്മാരരോഗത്തിന്റെ കാരണം കണ്ടെത്താനായി രോഗികളുടെ തലച്ചോറിനെ കുറിച്ച് നടത്തിയ പഠനമാണ് പുതിയ കണ്ടെത്തലുകളിലേക്ക് വഴിതെളിയിച്ചത്. ഓക്‌സ്ഫഡ് സര്‍വകലാശാലാ പ്രസിനു കീഴിലുള്ള സെറിബ്രല്‍ കോര്‍ട്ടക്‌സ് അക്കാദമിക് ജേണലാണ് പുതിയ പഠനം പ്രസിദ്ധീകരിച്ചത്.